旅發局近年其中一個吸引全球旅客的主要策略，就係鞏固香港盛事之都嘅地位。嚟緊十月八號，我哋會第三年舉辦「香港單車節」。今年，喺各個方面都有所提升，相信可以吸引更多頂級車隊來港作賽，亦會把握機會向海外推廣，增加香港的國際曝光率。
單車節嘅焦點活動「國際專業公路繞圈賽」，今年獲國際單車聯盟升格為亞洲巡迴賽其中一站，亦係全港首次舉辦一點一級單車賽事；比賽會成為專業計分賽事，以繞圈方式進行，每圈長五點一五公里，一百位專業車手要鬥一百公里。目前，國際頂級車隊ORICA-SCOTT GreenEDGE Cycling已落實參賽，我哋亦積極邀請更多勁旅來港作賽，相信今年嘅賽事更加精采刺激。
我哋都聽咗唔同持份者朋友嘅意見，當中亦包括好多參加者嘅賽後分享，同時亦吸取咗往屆經驗。因此，舊年好受歡迎嘅「五十公里組」，今年會增加多三百個名額，至二千六百個；預計整項活動將吸引逾五千人參加，打破以往紀錄。路線方面會繼續橫跨六區及挑戰「三隧三橋」，打氣區亦會擴大範圍，令到更多參加者嘅親友同市民，可以到場觀戰同埋打氣。除此之外，為咗慶祝香港特別行政區成立二十周年，我哋亦特別加設「二十周年紀念盃」，讓隊制計時賽嘅隊伍角逐。
旅發局仲會積極喺多個客源市場，尤其係短途市場，宣傳呢項盛事，希望可以吸引到更多嚟自海外嘅單車愛好者來港體驗這項盛事。
香港，就係「亞洲盛事之都」。
(刊於 頭條日報)