踏入十月，秋意漸濃，是戶外盛事嘅好季節。一年一度「香港美酒佳餚巡禮」（Wine & Dine Festival），將於十月二十五至二十八日在中環海濱舉行。今年係第十屆，旅發局將今年巡禮變身為一個大型生日派對，仲加入多項以「十」為主題的新元素，希望為旅客和市民帶來多重驚喜。
今年場地將由中環海濱活動空間延伸至添馬公園，面積比往年多兩成，規模亦係歷年最大。我哋一向注重場地佈置，希望提供更加舒適嘅品酒環境，今年十大美酒美食展區攤位共約四百五十個，我哋將酒類同美食攤位維持喺三比一嘅黃金比例，希望可以提升入場人士的品酒體驗。
講到品酒，今年除咗標準品酒證之外，旅發局仲特別推出「Perfect 10」紀念品酒證，已經開始公開發售，當中包括品酒劵、美食券、迎賓酒品，以及著名品牌Lucaris特別為十周年而製作嘅限量版金色水晶酒杯。呢款酒杯係獲獎設計，底部有五條標誌性嘅弧形線條，可以有助促進紅酒微氧化同軟化酒質，而金色版本更加係Lucaris多年來首次嘗試，別具收藏價值。今年我哋仲特別推出第十屆限定版酒品，同埋Wine & Dine面世年份嘅二○○九vintage，大家真係不容錯過。
美食方面，每年大受歡迎嘅「品味館」今年特別呈獻米芝蓮十星晚宴，市民反應熱烈，開售當日火速售罄。不過大家唔使失望，「品味館」喺二十八號仲會提供由香港文華東方酒店主理、以萬聖節為主題嘅下午茶，相當有新意。除此之外，新增加嘅「環球街頭小吃」及「咖啡園」兩大展區，前者由韓、歐、拉丁美洲等地區地道食品店坐鎮，後者則網羅城中多間著名咖啡店及烘焙甜點店，希望進一步提升佳餚嘅吸引力，帶來品酒以外嘅精采美食體驗。
Wine & Dine踏入第十屆，確實係一個難忘嘅時刻，期待喺今個月尾，同香港市民同埋旅客一齊慶祝「香港美酒佳餚巡禮」十歲生日！
(刊於頭條日報)