香港人，生活緊張，節奏急促。我哋從事娛樂事業嘅，都係希望為觀眾生活上帶嚟緩衝同開心，而talk show，就係香港人生活上一點調味。啱啱星期日，我就去咗睇《林海峰是但噏廣東話》。
今次林海峰（阿Jan）一連六場喺紅館開show，內容圍繞廣東話，阿Jan喺show入面都話，原來講廣東話都可以賺到錢！當然，佢有一貫嘅嬉笑怒罵數算香港社會現象。舞台設計都充滿香港特色：茶餐廳、巴士站、街舖，仲有垃圾桶！當然，我最like個session，梗係阿Jan同阿葛嘅「高山青龍」，出場唱廣東歌jam餐飽啦。
事實上，廣東話，即係「粵語」文化市場並不孤單。淨係講呢次是但噏，已經幾乎場場full house，買飛都唔係咁易，而且觀眾仲有來自澳門、廣東同東南亞等軟硬fans，有朋友更係海外華人回港放暑假。全球以粵語為母語的群體龐大，主要分佈喺粵港澳地區，大家同宗同祖，文化相似，語言相同。除咗港澳之外，廣東嘅電視台、電台都主要採用粵語廣播，可見粵語在內地十分突出，就連東南亞、美加都有粵語電視節目，廣東話可以話係普通話以外，數一數二的華人語言。
今時今日香港地，好多年輕人好buy「本土文化」，是但噏talk show講廣東話、唱廣東歌，幽默笑談本地社會現象，仲唔係本土文化之一？其實，阿Jan喺show入面着住紅色西裝登場時都講：「我係土生土長香港人，我愛香港。」聽到呢句，份外共鳴，我同好多香港人一樣，土生土長，熱愛這片土地，這就是香港地。所以，本地文化，絕對係需要我哋承傳落去。有人問我，我撐唔撐廣東話？我答佢：「我呢個專欄，都好似係用廣東話嚟寫㗎噃！」
(刊於 頭條日報)