VR推廣盂蘭文化 (林建岳) – 評論文章

香港有好多傳統特色文化,都值得我哋保育和傳承。上星期五起一連三日,潮屬社團總會就喺維園舉行「香港盂蘭文化節」,推廣倡導孝親和慈愛精神嘅盂蘭文化。盂蘭節係中國傳統祭祖的節日之一,早在百多年前,我們祖輩從家鄉移居來港,就帶來了盂蘭勝會的傳統。

香港潮人盂蘭勝會更獲評為國家級非物質文化遺產。

而家VR應用愈來愈多元化,今年活動亦特別引進VR技術。

上星期五我出席開幕式,都戴上VR眼鏡喺虛擬環境中體驗盂蘭文化,感覺真係幾逼真。

此外,會場仲設有盂蘭主題3D拍攝區,心願蓮池亦引入吉祥機械鯉魚,將傳統文化同現代科技結合,讓觀眾可以進一步認識同體驗盂蘭文化。

此外,潮劇表演及工作坊亦係今年亮點。「潮州戲」係潮州人盂蘭勝會神功戲嘅主打劇種,擁有深厚文化底蘊,工作坊吸引咗不少觀眾一齊畫面譜、穿戲服、玩兵器;而美食攤位今年就以「潮州粥」為主題,我同一眾主禮嘉賓都一齊品嚐,味道一流,有家鄉風味。

至於重頭戲一定係「搶孤」競賽,呢個係盂蘭勝會嘅傳統習俗,取勝要訣在於團隊合作,每年角逐都相當激烈。

今年搶孤競賽總共有五十四支隊伍參賽,數量為歷年之冠,當中有十六支喺境外團體隊伍,可見盂蘭文化品牌正在走向世界;今年仲有立法會議員和區議員組隊參與,一齊玩返場友誼賽。

今年係潮屬社團總會連續第四年舉辦「香港盂蘭文化節」,成功獲得海內外華人社會廣泛關注;而將傳統文化與現代科技結合,就係希望吸引更多年輕朋友參與,一齊傳承推廣傳統盂蘭文化。

(刊於頭條日報)