ENG

Sammi開show絕不留力(林建岳) – 評論文章

聲線對於一位歌者嚟講至為重要,更何況是對自己演出要求極高嘅artist。如果一位artist,聲線病重,但仍然堅持站在舞台,努力為觀眾演出,我們感受到的,已經超越演唱會嘅視聽享受,更是感受到不斷拼搏、永不言棄嘅崇高精神。

鄭秀文《Touch Mi 2世界巡迴演唱會2016》上星期於紅館開show。開show前幾日,Sammi已飽受鼻敏感、咳嗽同喉嚨發炎之苦,到上星期五晚首場開show都未能痊瘉。佢在台上頻頻自責,先後幾次落淚向觀眾say sorry,連講嘢都走晒音。有歌迷同我講,佢哋入場係為支持Sammi,就好似見返一位老朋友咁,佢哋更關心Sammi身體。

Sammi踏足紅館二十周年,今次concert其實係「Touch Mi世界巡迴演唱會」嘅尾站。一四年底,「Touch Mi」首站正是由紅館出發,兩年來Sammi去過好多唔同地方,但佢始終好希望返嚟香港做最後一站。我知道佢今次好用心準備,無論由服飾、髮型、化妝,到舞台、燈光、選曲等,都一次比一次出色,完全為觀眾帶嚟全新感受。早前排練嘅時候佢已搏到盡。我知道,Sammi仲嘗試針灸開聲,希望盡快恢復狀態。佢堅持做到最好的原則,「每一場,有幾多,俾幾多」。我對Sammi嘅堅持及付出,絕對係一百二十分支持同埋欣賞。Fans們嘅鼓勵同祝福,全場觀眾一齊大合唱,更加係Sammi堅持落去嘅動力。

呢個畫面,令我諗起香港精神,多啲包容,多啲欣賞,憑一點一滴的努力,堅持、永不言棄。我知道,Sammi的狀態回復得七七八八,不過我深信,佢每一場嘅演出,都係出盡十足的力量,絕不留力。

 

刊於頭條日報