MAMA十年 (林建岳) – 評論文章

熟悉韓流的朋友,一定知道MAMA。韓國年度樂壇盛事「MAMA亞洲音樂頒獎禮」(Mnet Asian Music Awards)上周圓滿落幕,佢對亞洲樂壇相當有影響力,稱得上係亞洲最大最頂級嘅音樂頒獎禮。

上周五,MAMA喺亞洲博覽館舉行壓軸頒獎禮,星光熠熠、陣容鼎盛。今年頒獎禮續由知名韓星宋仲基主持,佢一上台先用中文同觀眾打招呼,炒熱氣氛。今年防彈少年團(BTS)憑專輯《Love Yourself》系列獲「最佳年度專輯」、「最佳年度歌手」、「最佳音樂錄影帶」等五個獎項,成為大贏家。新晉男團Wanna One冧莊「最佳男團」,而「最佳女團」就由人氣女團TWICE奪得,佢哋仲獲得「最佳年度歌曲」、「最佳舞蹈表演女團」等不同獎項。

今年MAMA頒獎禮踏入第十年,繼去年之後,主辦方今年再打造「MAMA Week」,上周先後在韓國、日本及香港三地舉行為期一周嘅頒獎禮,更加係闊別九年後重回首爾,一眾歌手翻唱過去十年嘅經典金曲,為亞洲不同地方嘅觀眾帶來華麗音樂盛宴。除此之外,MAMA仲透過電視頻道和網絡平台在亞洲、以至歐美等地同步播放,同時亦可以在網站、手機應用程式重溫精采片段,同全球音樂fans一齊分享樂壇盛事。

MAMA至今已連續七年喺香港舉行,我哋寰亞亦連續第六年成為MAMA嘅共同製作單位。香港擁有便利交通及完善設施,每年舉辦不少大型演唱會同樂壇盛事,多年來MAMA選擇香港,不少年輕歌迷都遠道而來,這股潮流帶旺消費和過夜旅客增長。香港作為聯繫內地和國際「雙門戶」,在國家新一輪改革開放中,區域樞紐角色更加突出,各行各業發展都因而受惠。我們應該積極把握機遇,推動娛樂文化產業持續發展,開拓更廣闊的市場。

(刊於頭條日報)