本港疫情開始緩和，不少樂迷歌迷們都引頸以待大大小小嘅實體演唱會。今年七月，Leon黎明將會舉行首個暑假show，一連六場喺紅館舉行《Leon黎明Talk & Sing 2021》演唱會，為大家帶來久違了嘅興奮。
大家知道，Leon嘅show一向都勇於創新同迎接挑戰，每次都會追求突破，尋找「估你唔到」嘅新意，為大家帶來前所未有嘅娛樂體驗。好似二○一六年中環海濱舉辦嘅大型露天演唱會，唔少戶外嘅朋友都享受到由「核心」散發出來嘅氣氛。今次係Leon闊別十年後再次踏足紅館，我知道佢將會繼續發揮反傳統創意，在演出尋求突破，創造全新嘅Talk & Sing個人演唱表演形式，再一次為我們帶來驚喜。
過去一年，大部份活動都移師網上，面對面嘅交流突然變得奢侈，要再次舉辦實體活動確實非常不容易。今次實體show，Leon會將佢嘅音樂同埋金句揉合一起帶畀大家，令大家可以在沉悶嘅生活中加一點甜和愛。
當然，疫情之下舉辦演唱會一定要做好各項防疫措施。因應適當嘅社交距離要求，為了讓入場觀眾都可以在一個安全和舒適嘅環境下欣賞到Leon嘅精采演出，今次主辦方會率先安排場內一半較接近舞台嘅精選座位門票發售，並劃一門票票價。希望所有觀眾都可以喺安全距離下，全面感受到Leon嘅美妙音樂同妙語如珠。一個不設「山頂位」嘅concert，一個全新嘅Talk & Sing表演模式，勢必令觀眾全情投入。
(刊於頭條)