KiKi茶麵進駐上海 (林建岳) – 評論文章

好多朋友都知,我去年開始同來自台灣的KiKi拌麵合作,喺金鐘太古廣場開咗第一間實體店「茶.米」,顧名思義有麵又有茶,KiKi茶更係好多OL至愛。近日,我與同事就忙於將實體店擴展至上海,落戶喺公司旗下嘅上海香港廣場。今次亦係我哋喺內地第一間分店。

我每次去台灣都會去發掘下不同餐廳美食。其實餐廳本身喺台灣時就以四川成都料理為宗,擺脫傳統川菜印象,創造出不少新式川味創意菜。而拌麵的麵條本身,係台灣傳統手工日曬麵,製麵要經過特別嘅日曬過程,通過自然風乾達到防腐效果,天然無添加,麵條口感亦都因此特別彈滑,絕對係時尚健康之選。

金鐘嘅實體店走年輕化大眾路線,除咗主打粥粉麵飯等亞洲菜式外,仲推出台式茶飲,將川式主題同最真摯嘅台灣茶藝風味結合,譬如川味珍珠冬瓜茶、夏枯草珍珠茉莉綠等等。去年開業以來,唔少老友都同我講評價唔錯,仲叫我哋諗多啲新菜式、新口味。今次上海嘅新餐廳繼續走茶.米style,大家可以一邊品嘗KiKi麵同滋味美食,一邊享受台式茶飲風味。

開餐廳最緊要就係對食物質素有要求,食材夠新鮮,我哋會去搵唔同食材,嘗試更多新嘅菜式。台式茶飲就更加講究傳統地道配方及優質原材料,我哋專程從台灣直接空運製茶設備,並邀請經驗豐富的台灣茶藝師為同事提供全面培訓。今次,我哋率先引入美國品牌BKON真空萃取泡茶機,以先進技術萃取茶味精華,調製特色手搖茶及果茶。

返完工想relax吓,歎杯鳳梨青茶真係十分滿足。我有時都會同朋友去飲返杯傾吓計。

(刊於頭條日報)

訂閱經民聯訊息

Please enter your email:



佔領中環 劉皇發 張俊勇 張華峰 房屋 拉布 政制 政制改革 教育 施政報告 旅遊 普選 林健鋒 林建岳 梁君彥 梁美芬 盧偉國 石禮謙 經民聯 經濟 規劃 證券 證券業 財政預算案 金融