Happy New Year (林建岳) – 評論文章

仲有幾日就到二○一九年,旅發局今年繼續於除夕夜,喺維港上空舉行煙火音樂匯演,同大家一齊迎接新年,送上第一份祝福。

香港嘅除夕煙火音樂匯演一直係世界矚目嘅跨年活動之一,每年都吸引好多國際媒體報道,好似CNN、BBC都有直播匯演嘅盛況,深受本港市民同埋遊客歡迎。今次匯演唔單止有煙花,仲有音樂配合,聲畫同步合奏,煙花同燈光效果將隨音樂節奏幻變,整個匯演效果更加特別。另外,我哋仲會運用不同煙花以及不同位置嘅燈光,製造出多層次嘅視覺效果,相信會非常精采。

每年我哋都會為煙花圖案設計加入新意,今年亦唔例外。我哋首次採用多次獲得國際獎項嘅意大利煙花,呈獻全新嘅「星空萬花筒」,煙花圖案猶如「萬花筒」一樣變化,顏色亦會隨着轉變,令人目不暇給。另外,匯演壓軸一段更會在短短一分鐘內展現45款不同的煙花圖案,有不同花卉圖案、糖果圖案,仲有一直大受歡迎嘅笑臉同心形等,猶如繁花在天空中一同綻放,將維港上空化為一片美麗嘅花海。

除咗煙火匯演,當晚我哋仲邀請到人氣歌手喺尖沙咀文化中心觀景台表演,包括林子祥、新晉人氣男子組合MIRROR及人氣歌手江海迦(AGA)等,精采表演亦將即時投射至文化中心外牆,仲會透過電視和網上頻道作直播。除此之外,「許願流星」每年亦都大受歡迎,三座位於港島嘅建築物樓頂將會繼續發放四色「許願流星」煙火,大家記得抓緊機會許個新年願望。

我哋期望今年嘅匯演可以繼續為香港帶來國際曝光機會,有助香港繼續發展成為全球最受歡迎嘅旅遊城市。最後,祝願二○一九年香港更加璀璨繁榮。

(刊於頭條日報)