韓國娛樂文化強勁，「韓風」席捲亞洲以至全球。人氣男團EXO自二○一二年出道，短短幾年間獲多個樂壇大獎，去年七月開始展開第三次巡迴演唱會之旅。
上個周末，佢哋嚟到香港，一連兩晚喺Asia World Expo舉行「EXOPLANET #3 – The EXO’rDIUM – in HONG KONG」演唱會，今次係佢哋二○一七年首場concert，亦係相隔一年半後再次來港開show。門票一早售罄，除咗本港歌迷之外，亦吸引海外fans專程嚟睇show。EXO抵港當日適逢氣溫急降，不過一班fans熱情不減，冒寒去到機場接機。
演唱會上，EXO九名成員Xiumin、Suho、Lay、Baekhyun、Chen、Chanyeol、D.O.、Kai及Sehun，身穿紅黑西裝登場，以出道歌《MAMA》揭開序幕，全晚換上多個造型，自彈自唱，唱足近四十首歌，又上演濕身舞，絕對落足力。一連兩晚三個多鐘頭嘅concert，好多fans似乎意猶未盡，不過唔緊要，我知道佢哋今年會再嚟香港同埋推出新唱片，相信好快又可以再見面！
音樂無分國界，語言亦唔係溝通嘅障礙，不過EXO嚟到香港開show，都入鄉隨俗，不時用中文同大家溝通，而團隊中唯一來自內地的成員Lay（張藝興）更加講廣東話冧歌迷。佢最近喺廣州拍劇學會了多句廣東話，啱啱好派上用場，為concert增添不少「笑位」，好似一句「食菠蘿油」咁，已經冧曬班fans。
不少年輕朋友鍾情韓星，而家交通愈來愈方便，各地年輕人亦都興起到周邊地區睇show順道旅行。不過本港演出場地向來緊張，今次喺亞洲博覽館開show，雖然離市區較遠，不過對於專程搭飛機來港嘅海外歌手同fans嚟講，位置fit晒。如果將來啟德體育園區嘅場館落成啟用，搭郵輪嚟香港睇show，似乎也是不錯的選擇，更加可以帶旺消費和過夜旅客增長。
(刊於 頭條日報)