香港不單港式地道美食琳瑯滿目，世界各地嘅菜式亦都應有盡有。熟悉我嘅朋友都知道，我對美食都有少少心得，亦對經營餐廳十分之有興趣。相比起大型食肆，有時候鬧市中嘅精緻餐館可能更具特色。
一向以高級中菜馳名嘅唐人館餐廳China Tang，位於拉斯維加斯美高梅大酒店MGM Grand嘅新店，近日正式開張。
China Tang第一間店設喺倫敦多切斯特酒店Dorchester Hotel，之後我哋將餐廳帶返香港，喺中環置地廣場同尖沙咀海港城都有分店。
今次China Tang首次進軍美國，希望可以做到美食承傳，將中國美食帶到世界不同地方，為海外顧客帶來中菜美食體驗。
菜式方面，以傳統粵菜同地道港式點心為主，除此之外亦有四川菜、北京菜等。我哋亦去搵唔同食材，嘗試更多新嘅菜式。趁住農曆新年假期，我都有去親身去Vegas試過，出品都非常精緻，水準絕對同我哋喺香港嘅餐廳不遑多讓。
講開又講，繼二月初美國康州一連三日concert之後，張學友《A Classic Tour 學友‧經典世界巡迴演唱會》，二月十七號大年初二喺拉斯維加斯再度開show。
我知道學友當日身體抱恙，但依然keep到一貫的高水準，贏得全場掌聲。
學友向來對concert要求非常高，今次喺美國嘅開show都唔例外。今次concert，佢特別請來曾經參與太陽馬戲團演出嘅特技人員，就連舞台都係由亞洲運送過去，超過五十個貨櫃的設備，空運、海運足足用咗一個多月時間。
仲有，台前幕後工作人員大約二百多人亦都係由亞洲各地飛去美國，如此規模絕對係出盡十足的力量。
其實無論香港地道美食，還是本港流行音樂，都一直深受世界各地朋友喜愛，我哋要思考如何在承傳方面多下功夫，讓香港特式文化繼往開來，走向更廣闊嘅市場。
(刊於 頭條日報)