香港有好多傳統文化值得我哋傳承和推廣，就好似端午賽龍舟咁，一年一度嘅「香港國際龍舟邀請賽」已成為歷史最悠久的現代龍舟比賽之一。
由旅發局主辦、中國香港龍舟總會（龍總）合辦的「香港龍舟嘉年華」，會由今日起至星期日於中環海濱舉行。今年嘅活動，規模比舊年擴大，場地面積比去年增加五成，而其中喺維港舉行嘅「建行（亞洲）香港國際龍舟邀請賽」，就更加雲集咗歷來最多嘅國際龍舟隊伍和健兒，一共有四十八支來自內地同海外的國際隊伍參賽，再加埋來自香港一百一十六支隊伍嘅龍舟好手，總共會有超過五千健兒參加，競逐二十七項錦標，相信將會掀起連場激戰。
作為香港特別行政區成立二十周年其中一項慶祝活動，「香港龍舟嘉年華」今年亦特別增設「香港特別行政區成立二十周年建行（亞洲）紀念盃」，邀請全港十八區嘅龍舟勁旅一齊參加。除此之外，今年嘅比賽亦加入多項全新競賽項目，好似龍舟障礙賽等，又會再辦好受歡迎嘅「扮嘢大賽」，相信會為市民同遊客帶嚟連場精采賽事。
至於喺中環海濱舉行嘅嘉年華，就會以本地文化為主打，展出同本地藝術文化有關嘅展覽同裝置，當中包括由本地展能藝術家創作的特色龍舟和巨型龍舟槳擺設，以及由藝術團體操刀的巨型龍舟塗鴉牆等。至於嘉年華內嘅「生力啤酒節」亦會繼續設有特色拍攝區，佈置仲會重現往昔香港街角情懷。另外，仲有多個文創手作及遊戲攤位，好適合一家大細周末一齊嚟玩。當然，不得不提嘅係，十四架美食車亦會首次齊聚中環海濱，為大家帶嚟精采同多元化美食，又會同生力啤酒合作推出期間特別優惠。此外，多位本地人氣組合、歌手及DJ亦會輪流登場，為今次活動助興。
旅發局已連續多年同龍總合辦龍舟嘉年華，每年都吸引不少遊客慕名而來觀賞，再加上來港參賽嘅國際龍舟隊伍及隨團人員，我們相信透過這個活動，可以有助帶動旅遊相關消費，並為相關業界帶來更多商機。與此同時，我哋亦會藉此機會宣傳本地傳統文化，希望為旅客帶來更豐富嘅體驗。
(刊於 頭條日報)