好多人都鍾意睇show睇演唱會，熱門演唱會好多時都一票難求。劉德華《My Love Andy Lau劉德華World Tour》演唱會，二十場，跨年，要講嘅華仔都已經講咗，我無咩嘢要補充。不過我知道今個星期唔少朋友都忙於撲飛。
華仔每次開show，都會吸引一眾fans踴躍支持，今次亦都唔例外，早前門票尚未開售，就已經有市民提早排隊，仲發生咗一啲不愉快嘅事情，最後唯有取消售票處售票，只設網上同電話售票。星期二公開發售，短短幾個鐘頭已經全部售罄。一票難求之下，聽聞黃牛飛更加炒到數萬元天價。
黃牛O依家愈嚟愈猖狂，市面多了很多二手炒賣網站，而網上轉讓門票比以往方便，加上炒賣的暴利空間，催生黃牛市場。因此有意見認為，政府應該研究修訂法例，加強規管紅館等娛樂場館黃牛活動，提高刑罰；同時亦應該監管二手市場經營者以及二手網站的運作，從源頭打擊黃牛。除此之外，今次售票，問題亦在於售票網站無法負荷大量觀眾同時進入。其實，現今科技愈來愈發達，網上售票一定係未來發展嘅主要方向，真係有必要投入資源改善網絡系統，改善用戶體驗。
有朋友建議不如實行實名制，不過細節執行上，大家就需要提前幾個鐘排隊入場核查身份證明文件，即係本來O依家大約八點入場，實名制就可能要六點幾七點就要在場外排隊；實名制都會對旅客訂票引來不便，因此仲需要大家多作討論。
黃牛問題已經多次引起社會熱議；而讓更多唔同朋友欣賞到表演，一定係好事；唔少業界朋友亦希望業界健康均衡發展。不過點樣解決，的確要大家一齊探討。
(刊於頭條日報)