大型盛事係我哋吸引旅客嘅策略之一，繼上星期發佈「香港電競音樂節」後，呢個星期旅發局再公佈嚟緊十月繼續舉辦「香港單車節」。轉吓眼香港單車節已經第四屆，好開心喺社會各界朋友支持同配合下，規模一年比一年大。
今年香港單車節其中一個焦點項目，就一定係歐洲Hammer Series賽事的最後一站─Hammer香港站，今次將會有十一支世界頂級職業車隊嚟到香港，爭奪Hammer Series今季嘅總冠軍。
Hammer Series之前兩站賽事就吸引超過七百萬來自全球唔同地方嘅單車迷網上觀賽，今次首次登陸香港，相信可以為香港爭取更多國際曝光，鞏固「亞洲盛事之都」嘅地位。
講開又講，全球頂級職業車隊只有18支，佢哋全部擁有參與「環法」、「環意」呢啲全球一級賽事嘅資格。今次，有超過一半嘅車隊會嚟香港作賽，唔單止可以讓大家近距離觀賽，對於單車迷、甚至愛好運動嘅朋友嚟講，絕對係一個好消息。
除此之外，單車節另一焦點，當然就係各位朋友都可以一齊參與嘅「五十公里」以及「三十公里」組別賽事。今年，兩個組別都會增加名額，同時亦增設「粵港澳大灣區青年盃」以及「大學盃」，分別邀請大灣區11個城市嘅年輕朋友以及本地大學生組隊參加，希望鼓勵多啲年輕人一齊參與單車運動。
單車運動在世界各地都不乏愛好者，旅發局亦都會喺日本、台灣、韓國以及東南亞等客源市場，聯同當地業界推出包含「香港單車節」嘅行程；更加會首次同郵輪公司合作，推出參與單車節嘅飛航郵輪之旅，讓旅客嚟到香港旅遊之餘，仲可以參與單車賽事。
我哋希望大型體育盛事除咗吸引運動愛好者之外，同時亦為香港帶來更多旅客，一舉兩得。
(刊於頭條日報)