今年係回歸二十周年，旅發局希望藉此契機，豐富訪港旅客旅遊體驗，帶旺旅遊業發展。上星期五，蘇錦樑局長同我哋一齊，去到機場入境大堂，為抵港旅客派發「慶祝香港特別行政區成立二十周年禮遇精選」小冊子，同埋由一眾合作夥伴送出嘅紀念品。
至於今次派發嘅呢本精選禮遇小冊子，係由旅遊事務署、旅發局攜手推出，特別邀請本地二十一個旅遊景點及業界夥伴，為旅客提供多項優惠，希望豐富旅客在港嘅體驗。小冊子入面嘅優惠相當多元化，當中包括景點門票、交通、觀光遊、餐飲及購物等，超過四十項由本地景點同業界夥伴提供嘅優惠及禮遇。旅發局會通過轄下各旅客諮詢中心、本港多間酒店及旅行社等，派發超過八十萬本小冊子，讓旅客可以盡情感受到香港嘅多元特色。
旅遊業發展挑戰重重，面對周邊城市競爭，正如蘇局長所言，香港依然富有吸引力，每年有五千至六千萬旅客來港，呢個數字絕對唔簡單。睇返數字，今年頭兩個月，累計訪港旅客增長百分之一點四，當中短途市場表現唔錯，升幅達到百分之四點四。至於同期嘅過夜旅客就增加百分之四點五。我好開心，三月份上半月嘅初步數字亦顯示升勢延續，內地及國際市場都錄得增長，可以話係一個好嘅開始，希望良好嘅勢頭可以延續落去。
旅發局近年舉辦多項大型旅遊盛事，希望吸引更多旅客，豐富佢哋嘅旅遊體驗，打響香港「盛事之都」嘅招牌。適逢今年係回歸二十周年，我哋嘅盛事活動亦會加碼，旅發局正籌劃今年夏日喺中環海濱舉辦大型嘉年華，除此之外，嚟緊嘅「龍舟嘉年華」、「香港單車節」、「美酒佳餚巡禮」等亦都會加入慶祝元素，希望可以有更多新意，讓旅客進一步感受到香港多元化嘅旅遊魅力。
(刊於 頭條日報)