相信有關注開我個專欄嘅朋友都知道，農曆新年過後，演唱會一個接一個。其實我都幾鍾意睇騷同聽concert，平時做嘢壓力大，可以放鬆下，絕對係唔錯嘅選擇。
上星期五晚，黎明（Leon）再次喺中環海濱活動空間開騷，僅此一場嘅露天演唱會《Leon’s Penguins in Live 2017》吸引一萬六千多名觀眾，除了本地歌迷之外，更有不少來自內地及海外嘅fans專程嚟香港捧場。露天開騷如果遇上落雨都幾弊，雖然當晚天公作美，不過Leon話「有一隻歌一定要喺度唱……」，帶畀觀眾一首《相逢在雨中》，之後仲邀請嘉賓鄭秀文（Sammi）登台獻唱。
今次演唱會嘅亮點在於「one night stand」，堅係真stand！由於現場不設劃位，一眾fans要同Leon一齊企足成晚，加上當晚氣溫急降，只有十二度左右，要喺寒風中企住聽concert，真係有種南極「企鵝」feel，同今次個主題好match。Leon亦都提前喺facebook留言，提醒「企鵝們」要注意保暖。除此之外，今次演唱會更特別採用電子票，入場時需要scan QR code同核對身份證，希望杜絕黃牛「炒飛」，讓更多人可以入場睇騷。
近來呢類戶外騷愈來愈多，搞戶外騷也是辦盛事，除了要準備一般的舞台燈光聲效之外，仲需要搭建場地等，製作要求比普通室內騷更高。繼去年的4D演唱會之後，Leon事隔一年再次重返中環海濱，今次佢同團隊都特別用心，希望帶畀觀眾更好的體驗。喺「核心」外圍，去年野餐的熱鬧場面似乎不再，不過仍然吸引不少朋友駐足，繼續享受由「核心」散發出來的黎明歌聲。
近年香港多了中環海濱、啟德郵輪碼頭廣場等戶外場地，可以舉辦多種多樣的mega events。我一直期望，香港可以有更多新概念的mega events，這也是我們推廣香港吸引旅客的一個重要策略。
(刊於 頭條日報)