香港高爾夫球公開賽(Hong Kong Open)係全年最矚目嘅體育盛事之一，雲集全球各地頂尖球手爭奪殊榮，昨日開始一連四天在粉嶺高爾夫球會舉行。
Hong Kong Open今年踏入第60屆，係香港歷史最悠久嘅體育賽事，亦是亞洲頂級職業高球賽事之一，獲得亞巡賽、歐巡賽官方認可，亦讓世界頂級球手齊聚香港，包括兩位大師賽冠軍、美國球星Patrick Reed和西班牙球星Sergio Garcia，英國球星Tommy Fleetwood，衞冕冠軍Wade Ormsby等等，陣容非常強勁。今次賽事成績不單直接影響球手喺亞巡賽排名，同時賽事亦獲列為2019年歐巡賽首站賽事，氣氛緊張刺激，相當有睇頭。
旅發局一直積極支持不同體育盛事，希望豐富香港的旅遊體驗，吸引更多不同類型的旅客。譬如Hong Kong Open，場內除咗可以觀賞專業賽事外，仲有兒童遊戲區、高爾夫體驗區等，其實好啱一家大細一齊去玩。賽事每年都吸引不少外地球手和高爾夫球愛好者遠道而來，希望佢哋可以多留幾日，參與一連四日緊張賽事之餘，多啲到香港不同地方行吓，體驗香港地道特色文化，親身感受香港作為亞洲國際都會的多元文化魅力。
香港每年都有多項國際級體育盛事，可以話係全年無休。例如旅發局每年都會舉辦大型盛事「香港單車節」，亦積極支持各項不同體育盛事，包括香港國際七人欖球賽、Formula-E電動方程式錦標賽，仲有網球、馬拉松、龍舟、賽馬等各項賽事盛事，希望通過發展同支持更多體育盛事，為香港爭取更多國際曝光，吸引更多來自世界各地的旅客和體育迷，來港感受巔峰對決的緊張氣氛，提升香港作為「亞洲盛事之都」的形象。
(刊於頭條日報)