一連四日嘅美酒佳餚巡禮，上星期日落幕。呢幾日天公作美，人流非常暢旺，有超過十四萬人次入場，真係要衷心多謝旅客、市民、贊助同政府嘅支持。
夜晚嘅Wine and Dine Festival特別旺場，今年亦都唔例外，星期五晚入夜後人流愈來愈多，可以見到場內不少攤位都出現人龍。
有多次參展嘅朋友都有講，今年生意額同人流都比去年增加，銷量非常不俗。有到場的朋友同我講，部份酒商攤位未夠晚上十點就已經賣晒當日存貨。
今年全場攤位有四百個，其中有三百個攤位推介來自世界各地佳釀，另外一百個就出售特色美食。繼去年嘅特色雞尾酒大賣之後，今年首度推出嘅「氣泡盛薈」亦非常受歡迎，尤其係冰凍氣泡酒，可能因為天氣熱，更加特別好賣。有參展商講，最好賣嘅嗰支bubbling wine，短短兩日就已經售罄，要多次補貨。除此之外，今年場內首設「The Concept Store生活良品店」，喺提供佳釀和美食之餘，為大家網羅具創意及時尚嘅周邊產品，果然吸引到不少捧場客。
Mega events係我哋近年推廣策略之一，縱觀而言，據旅發局統計，今年頭九個月整體訪港旅客數字超過四千二百萬人次，較去年同期增加百分之二點二，當中以過夜旅客表現較好，內地及國際市場也有增長，可見近來的推廣策略收到成效，希望可以延續呢個好勢頭。
嚟緊兩個月，旅發局將會繼續舉辦多項大型活動，包括「香港盛宴十一月」、「香港郊野全接觸」、「繽紛冬日節」以及除夕倒數活動，同時亦會積極支持香港高爾夫球公開賽、Formula E等不同盛事，不斷豐富旅客訪港體驗。我哋仲會繼續同業界合作，針對年輕及家庭客群推出不同優惠和特色產品，希望吸引更多過夜旅客來港，感受香港繽紛冬日氣氛。
(刊於頭條日報)