發展旅遊，需要開拓不同的客源市場，近年旅發局加大力度向海外市場推廣香港，重點吸引過夜旅客。今個星期我哋再度出擊，專程去到吉隆坡，舉辦一連六日嘅旅遊推廣活動「香港活現吉隆坡」（Hong Kong．Live in Kuala Lumpur），向當地旅遊業界同市民推介香港旅遊特色。
講到旅行，我都幾鍾意去吉隆坡，嗰度有美食，有熱情好客嘅民眾，仲有豐富文化遺產，真係別有一番風味。香港同吉隆坡其實有幾分相似，兩個城市都具多元文化，兼具古今特色，係世界各地旅客必遊之選。
香港係一個融合古今、薈萃中西嘅國際都會，今次旅發局特別喺現場佈置「舊城中環」街景，鼓勵旅客更深度地體驗香港獨特嘅生活文化。中環可以話係香港歷史發展的重要標記，我哋特別推介五條主題漫步遊路線，分別凸顯區內歷史建築及地標、藝術文化、美食、時尚生活等元素，希望旅客行過這些漫步遊路線，從不同角度深度體驗香港的地道特色，感受中環嘅獨特風貌。
嚟緊冬日旅遊旺季，旅發局將會舉辦多項大型活動吸引過夜旅客，包括「繽紛冬日節」、除夕倒數活動，仲會有全新主題嘅「閃躍維港」光影匯演。今次我哋與旅遊業界、旅行社、航空公司等合作，在「香港活現吉隆坡」活動現場設立多個攤位，為馬來西亞旅客推出全新冬日旅遊優惠同package，希望吸引佢哋一家大細來港旅遊，體驗香港繽紛冬日氣氛。旅發局仲特別設立Muslim corner，為穆斯林旅客提供不同嘅旅遊tips，包括餐廳、景點同設施嘅選擇等。
香港多年來一直係馬來西亞短途旅客嘅首選之一，要鞏固呢個地位，就要開拓更多不同客源，豐富旅遊體驗，做足「好客之都」宣傳。
(刊於頭條日報)