恭喜發財，祝大家新年行大運！
農曆新年是許多人一年中最期待嘅節日。記得小時候，老人家話過年最緊要係有「年味」，享受一家團圓嘅傳統節日喜慶氣氛。香港每年都有好多「年味」十足嘅賀歲盛事，包括年宵花市、花車巡遊、煙花匯演、賀歲賽馬等等，旅發局亦一直推廣呢啲應節活動，希望可以吸引更多旅客來港過年，體驗別具本地特色的「年味」。
明日（大年初一）晚上，由旅發局舉辦的「新春國際匯演之夜」將於尖沙咀舉行。今年係香港回歸二十周年，而今次新春匯演係旅發局慶祝回歸嘅重點活動之一，將以「開年、開運、開心」為主題。當晚除了展出十部美輪美奐嘅花車外，更有二十六支中外表演隊伍共約三千人參與演出，規模歷年來最大，表演包括啦啦隊、舞蹈、魔術、雜技、鼓樂、花式單車、花式跳繩等等，絕對係多姿多采。除此之外，今年我哋增添更多新意，於匯演開始前沿巡遊路線向旅客同市民派發約一萬三千個開運福袋，仲會有由俄羅斯遠道而來嘅「糖果大師」一邊跳舞、一邊向觀眾獻上造型別致嘅棉花糖，希望帶畀大家一個甜甜蜜蜜嘅雞年。
香港不少地方都好有特色，新年要行大運，旅發局還特別為市民和旅客精選推介二十個好運景點，當中包括針對十二生肖嘅不同開運景點，遍佈全港多個地區。嚟緊幾日大家不妨去呢啲開運景點行返轉，「行大運」之餘，亦可以探索不同地區嘅特色，一舉兩得。
睇番二○一六年，受到環球經濟、匯率等多種因素影響，訪港旅客總數出現跌幅，不過國際市場方面，無論長途和短途數字都有不俗升幅，而來自南韓、泰國、菲律賓嘅過夜旅客更突破紀錄。今年，預期本港旅遊業發展仍然充滿挑戰，要發展旅遊，除左要發展旅遊基建，亦同時需要加強mega event和海外推廣。今年好多基本因素仍不算太明朗，我哋會繼續迎難而上，希望吸引更多過夜旅客訪港，為香港帶來更多商機。乘辭舊迎新之際，在這裏祝各位讀者雞年大吉大利，更祝香港新一年風調雨順。
(刊於 頭條日報)