講到美食，我一向都鍾意嘗試新餐廳新菜式。熟悉我的朋友都知，我最喜歡的不一定是大型食肆，有時候，一些小而精的餐館更有質素。
上星期，我就同埋屋企人仲有一班老友，去撐我一位好友張王幼倫（Michelle）同埋佢囝囝張嘉慶（Adrian）新開張嗰間粵菜館，我仲有幫手剪綵兼試菜。主理嘅大廚係陳日生師傅，Adrian話我知，餐廳起名嗰時，佢就係借咗陳師傅個名，「日生」為「星」，因此，舖頭名就以「星」字為首，起名「星月居」。之前我都有聽過陳師傅個大名，今次終於可以試到佢嘅大作。
菜單入面，有兩道菜我覺得最特別。一道係起首嘅順德鮮拆魚蓉羹，入口後味道層次豐富而不嗆口，仲可以留到空間俾之後嘅菜式，可見處理食材及配料的功力。另一道則是鮮蟹肉炒鮮奶，食材新鮮，調味同鮮奶運用恰當，enhance咗蟹肉嘅鮮味出嚟，額外嘅醋同調味咩都唔駛加。我一向喜歡同老友們輕談淺酙，因此我個人比較着重餐廳嘅setting同裝修設計。嗰度嘅setting以廂房為主要格局，可以同一班朋友自成一國，私隱度都唔錯；裝修設計則係以東方味道為主，同個菜譜都幾夾。
可能大家都知，我都有開餐廳嘅，開一間新嘅餐廳，其實真係要落好多心血同埋精神落去，好多嘢都要自己去handle，尤其是啱啱新開嗰幾個月，好多嘢一定要親力親為去協調去夾，先至會做得好。就算 家，所有餐廳都陸續上晒軌道，我都仲會成日去嘗試搵下新嘅食材、新嘅來源地，同主理嘅大廚交流下心得，讓成間餐廳，愈做愈好。我知道，Adrian仲會有其他進軍飲食界嘅大計，期望佢繼續加油！
(載於頭條日報)