我知道好多青年朋友都熱愛香港，熱心推廣香港旅遊，希望展示香港好客的一面。今日，我就會出席由香港青年協會、旅遊事務署及優質顧客服務協會舉辦嘅「香港青年大使委任儀式」。我擔任旅發局主席以來，都會盡力安排時間出席佢哋嘅典禮。
香港青年大使計劃，今年已經踏入第十七屆。佢哋致力培育青年人成為大使，傳揚主動協助旅客的友善風氣，建立好客文化，增加參加者對香港嘅歸屬感和多元文化認識。我知道新一批香港青年大使已經喺暑假完成一系列培訓，佢哋獲委任之後，就會駐守香港不同景點接待旅客，亦都會參與大型旅遊盛事服務，組織推廣活動，促進大眾了解和欣賞好客同埋優質服務文化；仲有部份大使會於海外的院校裏，籌辦推廣香港及中華文化活動，吸引外地朋友來港旅遊，宣揚香港好客之道。
旅發局一直全力支持呢項別具意義嘅計劃，喺過去一年，青年大使就參與咗旅發局多項大型盛事以及節慶活動，向旅客和市民推廣香港豐富、多元嘅旅遊體驗。有時我出席大型活動時，都留意到青年大使們嘅身影；好高興見到佢哋每一位都殷勤有禮地接待訪港旅客，展示香港好客之都的形象。今日我亦都會代表旅發局，表揚優異嘅青年大使，讚揚和感謝佢哋為香港旅遊付出嘅汗水和努力。我亦期待香港青年大使的生力軍繼續參與更多旅遊推廣活動，發揚熱情好客精神，一齊宣傳香港。
展望下半年，旅發局將會繼續加強推廣，重點吸引過夜旅客，尤其係短途巿場嘅旅客。我哋仲會繼續舉辦多項盛事，好似下星期五起，一連三日於會展舉行嘅「香港電競音樂節」，以及十月舉行嘅單車節、美酒佳餚巡禮，同埋年底嘅除夕倒數等等。另外，隨着高鐵香港段即將通車，相信亦會帶動西九龍總站成為旅遊新熱點，我們會好好把握這項大型基建所帶來的機遇，加強推廣，希望吸引更多旅客。
(刊於頭條日報)