近年，電子競技漸成新興產業，亞洲奧林匹克理事會早前宣佈，電競將在二○二二年杭州亞運會，成為正式比賽項目。電競活動深受各地年輕人歡迎，更有年輕職業選手參加職業賽事，在網上有不少followers。
旅發局將會喺今年八月，喺中環海濱舉辦一連三日全新「香港電競音樂節」，我哋將會集合電子競技、音樂、同埋美食於一身，呢次亦都係旅發局首個引入電競元素嘅大型活動。當中焦點，就係全球首個「英雄聯盟王者回歸世界邀請賽」，多位來自不同地區嘅「《英雄聯盟》職業聯賽戰隊」前成員將會回歸賽場，當中更有世界冠軍級人馬。旅發局會同時與多個網絡平台合作，用六種語言直播對戰盛況。
至於音樂元素，我哋特別邀請到來自韓國嘅SM TOWN Special Stage in Hong Kong首度登陸香港，陣容包括SUPER JUNIOR – D&E、YESUNG、SHINee、f(x)─Luna、EXO、Red Velvet、NCT 127 以及 NCT DREAM。佢哋除咗會獻唱自己嘅至Hit歌曲外，仲會有好多crossover表演。對喜歡K-Pop嘅朋友嚟講，一定十分吸引。除此之外，場內仲會展出多款喺本港從未曝光嘅最新電競同電玩產品，畀大家率先體驗。另外仲會有小食同消暑飲品，等大家玩得盡興。
現時訪港過夜度假旅客當中，有超過一半係年輕旅客。我哋特別將電競、音樂同美食這些深受年輕人喜愛的元素糅合起來，更選擇暑假期間舉行，希望帶來新鮮感，吸引年輕客群。最重要係，我哋希望藉住呢個嶄新活動，鞏固香港「亞洲盛事之都」形象，令旅客一諗起好玩嘅旅遊目的地，就會即時聯想起香港。
(刊於 頭條日報)