ENG

電競盛事回歸 (林建岳) – 評論文章

近年電子競技極受年輕人歡迎,唔單只係新興產業,電競項目更將成為今屆印尼雅加達亞運會示範項目之一,到二○二二年亞運會就會成為正式比賽項目。運動盛事從來都係旅遊盛事,因此,我相信電競主題盛事將會成為旅遊新亮點。

由旅發局主辦嘅「香港電競音樂節」,將於今年八月二十四至二十六日喺灣仔會展舉行,係全港最大型的電競主題盛事。今年活動更具規模,將有三場國際頂級電競比賽上演,包括「英雄聯盟王者回歸世界邀請賽2018」、「ZOTAC CUP MASTERS《CS:GO》盃賽全球總決賽2018」,以及首度引入「香港絕地求生(PUBG)世界邀請賽」,雲集超過一百一十位來自世界各地包括香港的電競選手參賽。講起PUBG,我知道唔少年輕人,甚至係大朋友,都極喜愛約埋一齊打PUBG﹔我哋今次係要求組隊作賽,仲有豐富獎金,大家可以諗吓組隊七月中嚟選拔賽。我之前有睇過啲年青朋友打,又要mark地圖、又要聽腳步聲槍聲、仲要有攻擊防守隊型,就算齌睇都好肉緊!

至於場內體驗專區,規模都擴大咗,仲有好多款最新電競遊戲同產品,仲會有音樂mini show,啱晒年青朋友。除此之外,我哋今年仲特別同香港電腦商會合作,買咗電競節門票嘅朋友可以入埋Hall One嘅香港電腦通訊節,一票兩行,希望可以發揮協同效應,帶動更多人流。

去年旅發局第一次舉辦「香港電競音樂節」,好高興得到本地同埋國際傳媒嘅廣泛報道,成功帶嚟超過一億五千萬元嘅全球宣傳效益,亦吸引超過七百四十萬人喺網上觀看電競賽事,為香港帶來唔少國際曝光。適逢八月盛夏,今年我哋將地點移師會展室內進行,等大家可以玩得更加盡興、更加舒服。我希望電競音樂節可以豐富旅客,尤其係年青客群喺夏天訪港嘅體驗,同時藉住舉辦主題盛事,鞏固香港「亞洲盛事之都」嘅地位。

(刊於頭條日報)