上星期六，大型豪華郵輪「雲頂夢號」（Genting Dream）由香港啟航，係首次有大型郵輪選擇全年以香港作為母港。同日，深圳蛇口太子灣郵輪母港亦正式啟用，粵港兩地同日迎新，對於區域郵輪旅遊發展嚟講，絕對係雙喜臨門。
就喺星期六嘅啟航典禮上，雲頂夢號所屬「星夢郵輪」總裁邀請我同一眾關心香港旅遊嘅官員，包括局長、常秘、專員等，一齊登船參觀。雲頂夢號高十八層，排水量十五萬噸，設施齊全，可容納三千四百名旅客同二千名船員。總裁帶我哋遊覽全船，我覺得最特別嘅，就係船上載有兩隻小型潛水艇，佢哋話，喺一啲水清嘅海域，坐喺隻潛水艇入面，真係好似同海入面啲魚擦身而過一樣，無論商務款客，定係甜蜜求婚，都係一流嘅選擇。
另外，一定要提嘅，係船上有個有多條賽道嘅保齡球場，總裁同我哋打趣講，佢哋有個「最低分」嘅記錄，事關郵輪在海上航行時，會隨波浪有輕微晃動，真係分分鐘保齡高手，都會全部落坑咁話。
除此之外，船上共有九間餐廳，提供多國菜式，當中，仲有香港人至愛嘅hot pot邊爐，你都咪話唔正。如果講到夜生活，船上仲有新加坡最大嘅Disco品牌，食飯飲嘢跳舞直落一流。船上嘅設備同娛樂，真係由一家大細到年輕活力去到商務款待都有。局長仲同我哋講笑話：「船上咁多好嘢玩，今次真係上船容易落船難。」
今次佢哋調派呢艘豪華郵輪，以香港及廣州南沙作為聯合母港，主攻亞洲市場，提供不同旅程，正正是看好區域郵輪旅遊市場嘅發展規模同潛力。旅發局一直致力於吸引更多高消費旅客訪港，近幾年來積極拓展郵輪區域合作，早在二○一四年已經與台灣觀光局合作成立「亞洲郵輪專案」，並先後邀請區內多個港口加盟，增強郵輪公司對發展香港郵輪市場嘅信心，鼓勵開發更多亞洲航線。
我們相信，隨着郵輪旅業發展漸成規模，香港旅遊業發展將更加多元化。香港亦要把握「一帶一路」發展機遇，與廣東、海南等鄰近港口攜手合作，積極開拓東南亞市場等不同客源，朝着共同開發國際郵輪精品航線而努力。
(刊於 頭條日報)