喺寰亞嘅電影入面，《志明與春嬌》係其中一個我最鍾意嘅系列。首齣《志明與春嬌》喺二○一○年上映。如果有睇過嘅朋友都會記得，故事背景係二○○七年香港實施全面禁煙，逼使煙民去晒後巷食煙，兩個主角張志明，即係余文樂，同埋余春嬌，即係楊千嬅，因喺後巷圍住垃圾桶煲煙「打邊爐」而相遇相戀。我哋喺二○一二年推出續集《春嬌與志明》，講佢哋拍拖同居咗一段時間，志明北上公幹，春嬌不滿，各有新戀情。
今次原班人馬為第三齣再度埋班，就叫做《春嬌救志明》，主要會喺香港有特色嘅地方取景。套戲開咗機無耐，早前戲組喺中環摩天輪拍外景，我都有去探班。今次《春嬌救志明》，繼續由彭浩翔執導，千嬅、樂仔領銜。之前有老友問我，話聽聞今次製作費加碼，仲請咗里安納度狄卡比奧（Leonardo DiCaprio）客串兼講廣東話咁話……我就笑笑口同佢講，佢聽啱咗一半。事關今次第三齣其中一個秘密武器，就係DiCaprio嘅專業替身會參與演出。最好笑嘅就係，真嘅DiCaprio唔識講廣東話，反而佢替身就操流利廣東話，fit晒套戲。
好多人都講，拍續集仲考工夫過拍第一集。我某程度上認同呢個睇法，因為觀眾睇續集，一定會同之前嘅比較，會有一個較為類同嘅reference point；續集要保留最核心嘅元素，亦要喺一啲位有驚喜同突破，要surprise到觀眾。所以，拍續集嘅關鍵，就係要拿捏好呢種承先啟後嘅「相同」與「不同」。港產電影的發展亦是如此，傳承和創新就係關鍵。
港產電影曾經萬人空巷、風靡全球有華人嘅地方。人在變，電影也在變。時至今日，香港電影業面對重重挑戰，電影業要做到傳承、創新同發展，不但要吸引年輕人投身行業建設，培養幕前幕後年輕人才，創造更多影視作品；也要增建戲院，讓優秀作品有地方展出，培養更大的觀眾群。講到創新，近年香港與內地合拍電影成為一條新路，面對「一帶一路」的發展機遇，港產電影如何把握機遇，開拓更為廣闊的內地和海外市場，的確值得我們一齊思考。
(刊於頭條日報)