每次同朋友講起香港嘅美酒美事，話題總離不開「香港美酒佳餚巡禮」（Wine & Dine Festival）。Wine & Dine Festival由旅發局主辦，呢項匯聚環球佳釀、星級美饌，同埋精采表演嘅年度盛事，已經嚟到第八屆，今年繼續載譽歸來。
呢個一連四日嘅活動，昨晚已經喺中環海濱拉開序幕。今年嘅規模更加係歷年之最，呈獻二十六個地方嘅佳釀，場地面積和攤位數目，都增加咗兩成。場內劃分為五個主題區，共有超過四百一十個攤位，有多個國家和地區的美酒佳餚，仲有造型別致嘅特色地道小吃。
今年，我哋除咗繼續有餐酒、派對酒、手工啤及威士忌等美酒之外，仲新加入雞尾酒。各位入場嘅朋友，可以喺「美酒佳餚新發現區」入面嘅「香港吧」，試到由創意調酒師調製多款以「香港」為主題嘅雞尾酒，款款都充滿本港特色：例如有調酒師會將威士忌配搭好立克、冧酒混合「啡走」、椰子糖加入冧酒等，新鮮感爆燈。
唔少得嘅，當然係「尊尚區」入面嘅「星級美食」攤位，入場朋友可以品嚐到由國際主廚創作、以香港為靈感的新派菜式。此外，多位來自米芝蓮星級食府及「美食之最大賞」得獎食肆的廚師，將會聯同「亞洲50最佳餐廳」之首Gaggan的主廚，在「品味館」合作主理「名廚美酒佳餚宴」，為大家帶來星級美食體驗。一如以往，有星級美食之外，我哋亦將各式街頭小食帶入會場，好似「七彩芝士吐司」、「帶子元貝湯狗仔粉」同「和牛雞蛋腸粉」，相信可帶來另一番風味。
「香港美酒佳餚巡禮」閉幕後，「香港盛宴11月」將會緊接登場，延續呢股美酒美食熱潮，整個十一月為旅客及市民帶來長達一個月的美酒佳餚體驗。本地主要美食區、多間餐廳及酒吧，亦會配合推出一連串精采餐飲優惠同埋主題活動，全面展現香港「美食之都」嘅魅力。
香港，就是「亞洲盛事之都」。
(刊於 頭條日報)