新一年就嚟到，旅發局每年都會舉辦除夕煙火倒數，與所有市民一齊迎接新年，亦令香港成為全球其中一個聚焦點，也吸引不少旅客專程訪港觀賞。下星期六晚，「2017香港除夕倒數」就會於維港及港島區多幢建築物舉行，為市民和旅客送上新年第一份祝福。
今次煙火倒數係旅發局首個慶祝香港特區成立二十周年的活動，我哋將擴大規模，打造成一個跨年盛會。除夕夜晚十點，首先拉開序幕係今年新增於尖沙咀碼頭近星光行一帶舉行嘅街頭派對，旅發局特別邀請一眾年輕歌手同組合參與表演，同大家一齊迎接新一年。除此之外，位於中環、金鐘、灣仔一帶六座建築物樓頂，將會於晚上十一點開始，每隔十五分鐘發放「許願流星」煙火，大家要抓緊機會許個新年祝願。
當晚焦點，當然係子夜嘅「煙火音樂匯演」。今年我們將煙花匯演由以往嘅八分鐘延長至十分鐘，包含煙花、音樂及燈光等豐富元素，並引入多款全新煙花圖案。海面上亦會首度引入靈感來自北極光的特別燈光效果，務求令匯演更加精彩。香港除夕煙花每年都吸引不少國際傳媒大篇幅報道，今年旅發局會繼續以人造衞星即時發放匯演盛況，更會透過主要社交媒體和視頻平台網上直播，令身處全球各地嘅朋友，都可感受到香港慶祝新年嘅歡樂氣氛。
回顧二○一六年，外圍環境雖有不少變動，影響到旅遊業整體表現。不過，喺整個業界共同努力之下，來自國際市場嘅過夜旅客數字，喺頭十一個月都有增長，無論來自長途同短途市場嘅旅客都有所增加；至於內地市場，近月跌幅亦都逐步收窄。展望新一年，我們要繼續提升香港旅遊吸引力和競爭力，為旅遊景點注入新元素、開發更多新嘅旅遊產品、舉辦各類盛事活動，豐富旅客嘅訪港旅遊體驗。最後，祝願新一年，香港百業興旺。
(刊於 頭條日報)