隨著互聯網的發展，近年各地開始興起網絡劇，並且愈來愈受到觀眾歡迎。
今個星期一，全新原創超級劇集《蝕日風暴》舉行媒體發佈會。劇集由優酷自製、寰亞傳媒聯合出品，發佈會上，總製片丁恒，監製梁家樹，導演洪金潑，主演張智霖、薛凱琪、王陽明、梁漢文、陳瑾如、李思函、梁靖琪以及眾多知名香港演員悉數亮相，製作班底絕對係非常強勁。
《蝕日風暴》故事係以港產製作最拿手嘅警匪片為主軸，融合犯罪、探案、解謎、懸疑等元素，劇集已於十月中開機，除了喺香港拍攝之外，嚟緊製作團隊仲會去到馬來西亞、布達佩斯實地取景。今次劇集更加啟用全電影製作規格，無論鏡頭、畫面構圖還是色彩質感嘅呈現上，都拍得上大熒幕效果，希望帶給觀眾全新視覺享受。我有睇過一啲片段，真係好精采，相信最後嘅成片會更加值得期待。
除此之外，我哋同步拍攝緊嘅仲有航空題材電視劇《壯志高飛》，由梁家樹監製、蔡晶盛導演，陳喬恩、鄭愷、朱梓驍、呂一、胡兵、許曉晗、張洋等主演，將於明年推出。
網絡劇發展市場龐大，數據顯示，二○一六年內地網絡劇產量總時數已突破十二萬分鐘，同比增長近兩倍，網絡劇年產量幾乎已經追平電視劇。網絡平台亦為影視作品帶來更加多元化嘅發展，就好似今次《蝕日風暴》提到嘅「超級劇集」concept，將來可以喺劇集嘅基礎上，衍生出漫畫、大電影等不同產品，將內容嘅價值影響力發揮到最大。
香港影視產業發展一定要拓寬出路，近年兩地合拍電影、合拍劇集逐漸成為一條新路，有助香港影視製作走向更廣闊嘅市場。