恭喜發財！豬年首篇專欄，首先祝願大家諸事順利、身體健康！
香港嘅農曆新年非常熱鬧，其中旅發局舉辦嘅「新春國際匯演之夜」係唔少旅客同埋香港市民年初一嘅必備節目，同時亦為香港帶嚟唔少國際曝光。今年好高興特首親臨主禮，當晚除咗有各式各樣嘅花車外，來自世界各地嘅表演亦非常精采，當中不少是國際級表演團隊，甚至世界紀錄保持者，真係令人目不暇給。除此之外，仲有年宵花市、初二煙花匯演、賀歲賽馬、香港許願節等等，好多精采嘅賀歲活動同埋好去處。旅發局亦都把握呢個黃金旅遊檔期，聯同業界喺客源市場推廣以新春節慶為主題嘅旅遊產品，希望吸引世界各地旅客親身來感受香港傳統節慶特色同地道文化。
睇番旅客數字，二○一八年訪港旅客增長創十六年來新高。當中，訪港過夜旅客數字接近三千萬人次，比二○一七年上升近半成，國際市場數字維持平穩，內地旅客則延續二○一七年的升勢，加上高鐵香港段及港珠澳大橋通車，上升約百分之七。嚟緊香港仲有不少重要基建工程，例如正在興建嘅機場三跑，將進一步強化香港作為旅遊樞紐角色，為旅遊業帶來機遇。大灣區旅遊生活圈逐漸形成，過年出行亦都更加方便，將來如果可以進一步拓展以香港為起點的大灣區「一程多站」旅遊，相信可以吸引更多外地過夜和高消費旅客，保持香港旅遊業長遠競爭力。
希望二○一九年香港旅遊業繼續平穩發展，帶動各行各業經濟持續繁榮發展。
祝願香港新一年，政通人和，百業興旺！
(刊於頭條日報)