香港人愈來愈注意健康同運動，跑步更由一股熱潮變成很多人的日常活動。上星期日，由「全城街馬」主辦的「香港街馬2019」就喺九龍東鬧市開跑，我都有去幫手主禮響槍，支持一下各位跑手，感受一下現場熾熱氣氛。當天早上天氣涼爽，跑手們都話有唔錯嘅表現。
街馬今年繼續以九龍東一帶作為主要路線，設有半馬同八公里，途徑觀塘、九龍灣一帶，再經啟德隧道、東九龍走廊，去到土瓜灣遊樂場做終點；賽道穿過唔少大街小巷，亦跑上高架公路和隧道，真係名副其實的「街馬」。
「全城街馬」是一所社會企業，他們相信跑步不單為跑手帶來樂趣，更能為跑手自身、身邊人以至社區帶來正面改變。我都覺得佢哋嘅理念唔錯，佢哋一直以青少年為服務對象，今次活動亦都係為「街跑少年」、「街跑一隊」、「基督教正生會」以及「香港青年協會家長全動網」等活動籌款，鼓勵社會一同關心青少年嘅成長。
近年身邊愈來愈多朋友注重健康同運動，唔少朋友更去參加各種各樣嘅跑步活動。我知道，而家差不多每個周末和周日，在香港不同地方也有大大小小的賽事，每個賽事由幾百到幾千人不等﹔有啲係fun run，有啲仲可以帶埋寵物一齊跑，有啲就係競賽﹔賽事唔單只係石屎路上嘅十公里或者半馬「路賽」，近年仲愈來愈多朋友參與以行山徑為賽道的越野賽和「山賽」。朋友們同我講，通常佢哋一係早上返工前晨跑練習，一係就周末同三五知己一齊享受行山樂﹔既可鍛煉身體，亦可聯誼相聚。
講到運動潮流，發展體育盛事一直係我哋推廣香港嘅方向之一。旅發局每年都會主辦大型體育盛事，同時支持不同國際賽事，希望吸引更多旅客來港參賽觀賽。嚟緊下個月又到渣馬賽事，報咗名嘅朋友一定要加緊訓練了。
其實，跑步唔單只可以從訓練中改善體能，亦可以培養出樂觀進取、永不放棄的馬拉松精神。香港精神，其實就是馬拉松精神。
(刊於頭條日報)