劉德華事隔八年重踏紅館，上月十五號就開始一連二十場《My Love Andy Lau 劉德華 World Tour – Hong Kong 2018》演唱會，希望同歌迷觀眾一齊度過聖誕跨年。可惜喺上星期五晚嗰場，華仔因為喉嚨發炎突然失聲，無法繼續演出。嗰晚我一知道，我同好多朋友都好擔心佢嘅情況。之後亦知道佢病況唔輕，往後幾日幾場演唱會亦都受到影響。
我一直都好支持華仔嘅演出，今次佢舉行跨年演唱會，我知道唔少fans都十分期待，尤其係平安夜同除夕夜嗰幾場。記得上星期平安夜嗰場，舞台仲特意換上聖誕裝飾同佈置，華仔仲同全場fans一齊合唱聖誕歌，現場氣氛真係好high。可惜，佢最後因為確診流感而要休息，佢自己都話，「真的……很不好意思，深深向所有受影響的大眾們致歉」。
我同華仔認識咗好多年，我相信如果唔係因為病情失聲而逼不得已，任何情況下，佢絕對會選擇一路唱落去。我十分認同對於一名專業歌手嚟講，健康同演出水準同樣重要，更何況是對自己演出要求極高嘅artist，一定會make sure演出質素，我相信呢個亦都係對fans同觀眾負責任嘅做法。
對於取消演出嘅後續安排，不少觀眾千辛萬苦撲飛，我絕對明白補場係好過退錢。我知道華仔佢哋已經入紙向紅館申請今年十二月份嘅場地，希望能夠安排補場演出，相信今個月底之前可以有消息。如果成功租用場地，觀眾仍可選擇補場或者退票；若果申請失敗，亦會馬上安排退票。今次受影響七場演唱會嘅朋友，記得保留好門票，等待華仔佢哋公佈最新消息。
我知道華仔𠵱家嘅狀況已經好轉，相信好快可以康復，希望佢身體可以ready，同各位見面。相信佢之後每一場嘅演出，都一定會一如以往地全力以赴，絕不留力。最後，大家也要在寒冷的天氣，注意身體！
(刊於頭條日報)