由旅發局舉辦嘅「香港美酒佳餚巡禮」昨日拉開帷幕，一連四日喺中環海濱活動空間舉行。今年巡禮有約四百個美酒和美食攤位，除咗為大家帶嚟好多靚酒同美食之外，仲特別加入生活品味元素，內容更加豐富多采。
今年五大美酒展區，展出來自二十個國家和地區的佳釀，包括新增設嘅「Robert Parker Wine Advocate」同埋提供唔同Bubbling wine嘅「氣泡盛薈」專區。Robert Parker係世界頂級品酒權威，今次喺「Robert Parker Wine Advocate」展出嘅美酒全部都由佢嚴格挑選，評分達八十八分。至於「尊尚名酒區」，就會有國際權威酒評家James Suckling推介嘅靚酒；而喺國家展區除咗會繼續有唔同地方嘅好酒之外，仲會展出一啲從來未喺香港賣過嘅波爾多佳釀。
美食方面，今年有更多知名食肆助陣，我哋搵咗城中十大型格餐廳，包括米芝蓮三星餐廳，同大家帶嚟環球美食。譬如喺「品味館」，就會有三位世界頂級名廚包括：國際知名嘅米芝蓮三星餐廳The Grace總廚兼創辦人Curtis Duffy、亞洲最具影響力廚師之一嘅台灣名廚André，同「亞洲甜品女王」Janice Wong、再加上香港洲際酒店兩位名廚，一齊炮製「名廚美酒佳餚晚宴」。
今年活動我哋諗多咗好多新嘢，希望令旅客同市民玩得開心盡興。旅發局亦特別加強海外宣傳，聯同海外業界以及航空公司於十三個客源市場，推出美酒佳餚主題的遊港產品。除此之外，亦會透過社交平台、數碼媒體推廣及公關宣傳，希望吸引更多旅客入場。
嚟緊周末不妨同三五知己一齊，去到中環海濱一邊品嚐世界各地美酒和佳餚，一邊欣賞維港美景，相當寫意。
(刊於 頭條日報)