旅發局每年都會舉辦「香港旅業展望」簡報會，向業界朋友介紹新一年的推廣策略同工作計劃。今年以「尋突破掌機遇」為題，探討在這瞬息萬變的時代，香港旅遊業所面對的機遇和挑戰。
今次亦係我最後一次以旅發局主席身份與大家分享對旅遊業發展的看法。從二○○八年全球經濟衰退到二○一七年旅遊業全面復甦，香港旅遊業經歷了充滿挑戰的十年。面對挑戰，旅發局以發展盛事旅遊作為推廣策略之一﹔過去十二年，旅發局積極推動引入多項嶄新大型盛事，好似香港龍舟嘉年華、香港電競音樂節、香港單車節、香港美酒佳餚巡禮、香港郊野全接觸、仲有閃躍維港燈影節等等，打造香港成為亞洲盛事之都。同時我哋亦加強海外推廣，同政府、業界以及周邊城市積極合作，開拓不同客源市場，吸引更多過夜和高消費旅客。近年大型基建陸續上馬，港珠澳大橋、高鐵、西九戲曲中心相繼落成，我們與大灣區城市攜手推廣「一程多站」旅遊合作，香港作為連繫內地和國際雙門戶的優勢就更加突出，旅遊業發展亦因而受惠。
旅發局嘅工作當然有唔少難忘回憶，我記得二○一四年嘅美酒佳餚巡禮，因為受佔中影響，臨時要由中環移師啟德遊輪碼頭，短短三個星期裏面，我哋要同政府部門溝通，同參展酒莊、贊助商解釋，推出優惠吸引人流，仲要安排接駁巴士物流等，最後活動都順利舉行，實在有賴旅發局團隊嘅齊心協力，高效應變。
眨吓眼，我服務咗旅發局已經十二年，非常榮幸可以同政府、業界朋友、社會公眾、以及旅發局一班同事一起同行打拼，亦十分多謝傳媒朋友大力支持旅發局的工作。我稍後將會在貿發局新崗位上服務，喺推廣香港商貿發展的道路上，繼續與各位前行。
(刊於頭條日報)