酒文化在我國歷史真係源遠流長，古代祭祀、祝捷，現代社交場合、開party、宴會喜慶，酒都是不可或缺之物，可以令賓主盡歡。
我忽然有感而發，係因為見到政府在十一月三十日開始，「禁止任何人透過當面或遙距分發，向十八歲以下人士售賣和供應令人醺醉的酒類」，簡單啲講，就係禁止以任何方法向十八歲以下青少年賣酒；政府嘅解釋，立例係為咗保障青少年人嘅健康，咁睇，呢條法例都應該好合理。
但係上周在媒體卻看到一則報道，話食物及衞生局局長陳肇始表示，為了帶頭以身作則，食衞局以後請食飯都唔會有酒供應；我覺得有啲奇怪，唔通陳局長想由禁止向青少年賣酒，進一步走向全面禁酒？
禁酒呢樣嘢，好多國家都曾經試過，結果都係失敗收場，因為享受美酒係好多人嘅嗜好，政府立例禁止，只會催生黑市或非法賣酒，結果係禁之不絕，反而好多劣質酒流入市場，嚴重影響人民嘅健康。
香港在二○○八年二月撤銷所有葡萄酒稅，葡萄酒業發展一日千里，也推動香港成為了區內的葡萄酒貿易及集散中心，葡萄酒進口迅速增加，十年之間，葡萄酒進口總值由十六億元，增加至今年上半年的六十二億元，並且創造了大量就業和生意機會。
至於每年一度嘅美酒佳餚巡禮，亦成為了香港和國際的年度盛事，除了本地人，也吸引了大量遊客進場，享受香港不同種類、多姿多彩嘅美酒品嚐體驗。
任何嘢過多都係唔好嘅，飲酒亦如是，成年人都應該知道點樣保障自己健康，亦都知道自己嘅酒量，飲幾多，自己酌量，跟朋友一齊，即使係淺嚐幾口，都會覺得開心愉快。當然飲咗酒就千祈唔好揸車，呢方面政府已經立例規管，開車前咪飲，一定唔可以犯規。
希望政府明白，過多的干預其實並非好事；酒文化有幾千年嘅傳統，只要適量品嚐，係可以增加生活情趣、促進友誼，政府對此毋須太多管制。飲幾多，每個人都會心裏有數。
(刊於頭條日報)