立法會最後一次會議喺上周五結束，意味今屆立法會會期畫上句號。可惜，市民最深刻可能未必係成功推動咗幾多有利香港嘅政策、過咗幾多條bill，反而係無日無之嘅拉布同罵戰，甚至到咗會期最後一刻，依然就拉布爭拗不休，令人感可惜。
好多議員朋友都同我呻，雖然已經休會，不過仍然彷彿keep住聽到點人數的「噹~噹~噹~」鐘聲。總結今屆立法會，會議時間長達二千一百八十六小時，係史上最長，但係當中有十分之一時間用咗喺點人數上面，總共有一千四百七十八次，四年會期更加流會十八次。拉布已浪費立法會大量議事時間。其實，拉布客觀影響，係令有關經濟民生政策、撥款及基建工程未能上馬。與其話拉布，不如話拉香港後腿。
立法會職責係審議政府法案同撥款，監督政府施政，在角色上係監察者，亦係推動者。如果立法會唔能夠做好推動者角色，政府就很難施政，香港亦難發展。相信大家都認同，近年香港發展速度不斷減慢，拉布正係香港發展嘅最大絆腳石。多項基建撥款工程一拖再拖，多條關係民生法案，包括醫生註冊（修訂）條例草案、消防修訂條例草案未能夠及時通過；多個推動經濟發展嘅議員議案唔能夠在立法會辯論，議事廳充斥點人數鐘聲同埋議員對罵聲，香港發展自然受到拖累，失去咗以往效率。香港，一向都係一個有商有量嘅地方。社會唔會因為拉布而獲益多咗，相反，只會令香港的引擎在空轉。
面對現時外圍經濟環境不明朗，加上周邊對手競爭，香港更加需要加快發展，以應對未來挑戰。寄望新一屆立法會議員可以好似《獅子山下》歌詞咁，「放開彼此心中矛盾，理想一起去追」，齊齊開足turbo，追番香港失去嘅歲月。
(刊於 頭條日報)