相信大家都記得，張德江委員長去年訪港，提到香港發展經濟要「勿忘初心，方得始終」。時隔一年，委員長今個星期到訪澳門，高度評價澳門在貫徹落實「一國兩制」和《基本法》、發展經濟民生所取得嘅成績。港澳兩地一衣帶水，我哋應該借鑒澳門嘅成功經驗，從中得到啟示。
委員長一直非常關心香港同澳門經濟發展，今次訪問澳門亦特別提到，澳門去年GDP較回歸時增長了五點九倍，年均增長百分之七點七五，人均GDP達到六萬九千美元，喺世界上處於領先地位。委員長說，很高興見到澳門「立足當前，謀劃長遠」，把握國家「十三五規劃」和「一帶一路」等戰略機遇，促進經濟適度多元發展。
睇返香港嘅數字，二○一六年本港人均GDP接近四萬五千美元，雖然喺國際上亦有一定競爭力，但遠低於毗鄰嘅澳門和新加坡。我知道，好多人都同我一樣，對此都好唔甘心。今年「兩會」時，委員長多次在不同會議上提醒，希望我哋香港人應多啲關心經濟，唔好搞咁多政治爭拗。其實大家都知道，近年香港社會爭拗不斷，立法會拉布頻頻，經濟發展受到阻礙。相反，喺一海之隔嘅澳門，穩定嘅社會環境，為發展經濟提供了有利條件。
委員長多次講到，希望我哋可以趕上步伐，搭上國家發展的快車，同國家一齊發展。李克強總理在政府工作報告港澳部份，提出要研究制定粵港澳大灣區城市群發展規劃，正好為經濟發展帶來新嘅機遇。香港喺金融、貿易、航運等多個方面擁有獨特優勢，相信完全可以喺大灣區建設中，發揮優勢，一展所長。
逆水行舟、不進則退，香港社會要發展，民生要改善，就必須把握機遇，凝聚力量發展經濟，學習澳門嘅成功經驗：「團結，包容，務實進取，不爭拗，不空耗」，不要再錯過國家發展的快車。
(刊於 頭條日報)