ENG

海洋公園酒店主打綠色環保 (林建岳) – 評論文章

海洋公園萬豪酒店今個星期開始試業,酒店由建築設計、裝修、再到運營,都加入環保概念元素,籌備上的確要花費更多心思。譬如,酒店餐廳在食材選擇上就有嚴格要求,要按照WWF嘅標準選用可持續發展海產,避免購買一啲瀕危、或有過度捕撈問題嘅品種。

大家知道,我一直鍾意研究不同菜式,今次在海洋公園酒店亦有經營兩間餐廳,其中粵菜餐廳「南海小館」就以順德河鮮作為主打。其實烹調河鮮好講究功夫,需要辟走泥味,帶出鮮味,好多時都要加醬汁調味。我哋採購嘅河鮮,飼養嗰陣就做咗特別處理,例如水中加入臭氧去味,成本雖然貴啲,但就可以用更為清淡嘅烹調方式,品嚐到河鮮嘅原汁原味。開業之前,我都多次去到順德試菜,希望可以搵到更多新鮮食材,最後仲邀請到尤師傅嚟擔任餐廳嘅行政總廚。

海洋公園一直致力保育大自然,我哋酒店設計都係以海洋為主題,設計上採用綠色環保概念,希望帶畀賓客充滿自然色彩嘅體驗。一步入大堂就會見到一個十八米高嘅圓柱形水族館,垂直跨越三層樓。水族館將會飼養人工珊瑚礁,以及數十種不同品種、總共過千條嘅特色魚類,當中包括棘魚、蝴蝶魚、河豚及其他非瀕臨絕種野生海洋生物。o依家水族館已經開始注水同監測水質,遲啲完成隔離免疫就可以分批放魚。

除此之外,酒店還有一個全港島最大嘅無柱式酒店宴會廳,裝有全自動偵測系統,空調系統會因應在場人數而自動調節,從而減少用電量。其實呢個系統喺酒店唔同地方都有應用,我哋預計一系列節能措施可以為酒店節能大約四成,計落真係唔簡單,希望可以為環保出一分力。

(刊於頭條日報)