一連兩日的Formula E電動方程式錦標賽香港站，上周末在中環海濱上演，賽會宣佈吸引約兩萬人次進場。我星期日都有入場欣賞，場內氣氛唔錯，仲見到唔少車迷喺場外IFC商場同埋附近行人天橋圍觀，大家都用唔同方法在場內場外參與呢場香港盛事。
Formula E幾經波折終於可以落戶香港，體育競技之外，仲可以向外宣傳香港，為旅遊業帶來活力。今次Formula E將中環CBD化身賽道，以維多利亞港為背景，途經香港大會堂、IFC、中環渡輪碼頭等地標，算得上係香港最正地段之一。今次雖然係香港第一次喺中環辦賽車賽事，不過，依我現場所見，氣氛不俗。雖然沒有一般賽車的電油味，卻為香港人在中環核心區帶來了一場咁有速度嘅體育盛事。
當然，我都聽到有老友或許說賽事安排仍有進步空間，譬如部份賽道可以闊啲長啲。不過，今次只係香港首度舉辦Formula E呢項大型賽事，我相信大會一定會累積經驗，研究未來如何優化，使活動能夠搞得愈來愈好。另外，有朋友同我講，部份大會門票好似有啲貴，但其實我們都明白，籌辦賽車所花嘅資金絕對唔少，其他地區嘅賽車門票收費可能仲高昂。我覺得，新加坡有F1吸引賽車遊客，而我哋香港依家都有FE，相信可以為香港嘅旅遊業帶來新動力同新元素。
其實澳門也好、新加坡也好，賽車每年都會吸引世界各地的車迷慕名觀賽，為當地帶來旅客。如果Formula E可以固定成為香港年度體育盛事，搞得更加有聲有色，絕對有助維持旅客嘅新鮮感，擴大客源，吸引旅客再來。我相信，舉辦更多盛事，絕對有助推廣香港、亦為旅遊業發展帶來更多機會。
最重要，係可以鞏固香港作為「亞洲盛事之都」嘅地位。
(刊於頭條日報)