今日大年初七，人日，祝大家生日快樂！喺度我許番個願：希望香港旅遊業愈來愈興旺。
發展旅遊，要開拓不同客源市場，近年旅發局加大力度向海外推廣香港，重點吸引過夜旅客。最近我哋再次出擊，去到台灣、首爾、北京和曼谷等地區，向當地業界及傳媒推介全新香港品牌「盡享‧最香港」（Best of all, It’s in Hong Kong），最新一站係上周嘅東京。
我經常諗，點樣先可以更好地向旅客推介香港特色。喺東京舉行嘅發佈會，旅發局推出以時尚、美食、親子遊，以及大自然景色為主題嘅四條全新宣傳片，由港人嘅角度去遊歷香港、感受香港，帶領旅客跟隨我們腳步發掘最地道旅程。其實，好多旅客都嚟過香港，今次我哋推出「盡享‧最香港」嘅概念，正正希望向旅客介紹「最香港、最local」一面，就好似四段新短片中，食雲吞麵、幫襯大排檔、逛金魚街、深水埗布街、大澳等等，品嚐香港人鍾意嘅地道美食，走入各區體驗不同景色和文化，領略新舊融合、中西薈萃的都市魅力。
我哋仲請到兩位日本「香港迷」義務做「代言人」，一位係人氣強勁嘅影星水原希子，另一位係銀座久兵衛主廚今田洋輔，佢喺日本飲食界地位崇高，好榮幸有呢兩位份量十足嘅名人同大家分享香港旅遊體驗，我即場頒發「星級香港迷」證書多謝佢哋支持。至於香港點樣俘虜兩位「星級香港迷」？水原希子嚟過香港好多次，好熟悉呢度，佢除咗推薦旅客去南丫島食海鮮體驗漁村悠閒之外，原來佢每次嚟到都一定晨早起身去食皮蛋瘦肉粥，絕對係佢至愛！我真係估唔到頂級大廚今田洋輔，亦都同我一樣鍾情香港地道美食，仲從中找到靈感創作壽司。
過去一年，訪港的過夜旅客約有二千六百五十五萬人次，約佔整體訪港旅客近五成，其中以短途市場的升幅較為顯著。今年旅發局會繼續加強海外市場嘅推廣，以及舉辦mega event並加入更多新元素，希望可以吸引更多過夜旅客，做旺本港旅遊業，做足「好客之都」的宣傳。
(刊於 頭條日報)