文化的影響力超越時空、不分國界，不同國家之間嘅文化交流，不同文明之間嘅互相溝通，係當今世界發展嘅大潮流。
上星期六，由香港文化產業聯會總會（文聯會）與香港絲路文化協會聯合主辦嘅「一帶一路系列：古絲路文化研討會」，喺香港中央圖書館舉行。我哋邀請到多位學者同專家，包括來自巴基斯坦的賽義德參議員（Senator Mushahid Hussain Syed）、北京清華大學的李希光教授、香港中文大學的金玟求教授，以及余浩然、梁曉新、李宗鴻，佢哋分別以政治、歷史、藝術等不同角度，去詮釋絲綢之路文化，以及「一帶一路」發展。
對於絲綢之路呢個concept，有啲朋友可能不太熟悉，但講到文化交流，相信大家一定唔會陌生。香港係一個中西共融、兩文三語、自由開放嘅國際都會，我哋有本土嘅電影、音樂、出版、設計等文化產業，同樣亦有大量來自外國嘅文化產品，不同文化嘅匯聚，為我哋帶嚟更加多姿多采嘅生活。香港可以話係東西方文化交流嘅重要窗口之一。就好似位於深水埗嘅李鄭屋漢墓，相信不少朋友都去過，金玟求教授演講中話，古墓中穹頂結構的靈感原來係來自波斯，呢個對研究古絲路文化有重要意義。
巴基斯坦係「一帶一路」沿線重要一站，講到推廣巴國經濟文化，賽義德參議員絕對係個top sales。佢話中巴友誼源遠流長，巴基斯坦最近建成嘅瓜達爾港，係中巴經濟走廊的重要港口，為中國開通咗一條新航路。佢以深圳作比喻，話瓜達爾港將會成為巴國經濟特區，更建議港商要把握商機，組團去考察吓。
「一帶一路」連接不同地區經濟、社會、文化，希望促進區域合作，實現共同發展。香港作為金融貿易中心和航運樞紐，有優秀嘅人才，以及連接內地與國際嘅經貿網絡，面對國家「一帶一路」發展戰略，如果我哋可以把握機遇、充份發揮香港嘅獨特優勢，相信可以打造出「一帶一路」下，最理想嘅國際文化交流平台，推動本港文化產業發展再創高峰。
(刊於 頭條日報)