「高音甜、中音準、低音勁，簡單嚟講，通透。」係二○○二年電影《無間道》第一幕入面，「陳永仁」（梁朝偉飾） 喺Hifi舖就係咁樣sell「劉健明督察」（劉德華飾）。一聽到「是誰……」（用普通話唱出），腦海裏就會響起蔡琴嘅磁性歌聲。呢首，正是華語歌壇天后蔡琴的一首名曲《被遺忘的時光》。今明兩天，蔡琴就會嚟香港，喺紅館開兩場演唱會，同大家分享經典金曲！
蔡琴歌聲極具感染力，是華語歌壇嘅天后級歌手。佢以演唱民歌出道，其後推出流行歌曲、歌舞劇紅遍大江南北。佢出道數十年，依然風華絕代，近年嘅巡迴演唱會、個人唱片都廣受各地歌迷追捧。之前，蔡琴接受電台節目訪問時仲半講笑話，之前試過嚟香港入境過關時，關員沒搜查佢行李，不過，就喺幫佢檢查證件時卻哼出：「是誰……」，令佢感到非常有趣。
蔡琴嘅唱片賣個滿堂紅，曾多次獲得金曲獎等獎項，紅透半邊天。然而風光背後，往往是鮮為人知嘅辛酸事。今次演唱會，將展現蔡琴事業嘅四個階段，由初出道嘅主打民歌階段，到八九十年代嘅全盛時期，再到一段事業低谷，以及最後跨過低潮嘅重新振作，猶如佢三十七年歌唱生涯嘅寫照。蔡琴今次特別展現呢一段高低起伏，佢話經歷一連串打擊嘅人生低谷嗰陣，係香港人畀佢支持，係歌迷畀佢鼓勵同動力，令佢走出逆境，因此充滿感恩。佢更加話，自己對香港好有感情，「香港是我的福地，香港是我的天使」。
香港人傑地靈，多年來確實捧紅了不少歌手藝人，本港娛樂文化一直以來引領着整個華語社會。而喺經濟方面，香港可以由昔日一個小漁港變成今日嘅國際大都會，更是成就斐然，培養了不少金融、科技人才。不過，就如人生一樣，城市發展亦有高低起伏，發展過程中亦會充滿種種波折和困難。如今，面對外圍經濟壓力、社會爭拗不斷，如何走出困局，正考驗我哋港人嘅智慧。不過，最重要嘅，就是珍惜和感恩。
(刊於頭條日報)