轉瞬間二○一八年已經過半，近日我都有同傳媒朋友相聚，講講上半年旅遊業表現，分享下半年嘅推廣策略，亦向各位傳媒朋友請教一下對香港旅業前景的看法。睇返數字，今年上半年整體訪港旅客約有三千萬人次，增長達一成，長途市場及新市場旅客數字亦有平穩增長，總體而言表現確實不俗。
預期下半年受到環球經濟波動影響，旅遊業面對不同挑戰，旅發局將繼續加強推廣，重點吸引短途巿場過夜旅客。我哋一方面會加強與航空公司，特別是同廉航合作，推出不同旅遊產品；另一方面亦會繼續以家庭同年輕客群作為重點，配合不同大型活動推廣，包括香港電競音樂節以及單車節等，豐富年輕客群嘅訪港體驗。
講到mega event，焦點必定係十月嘅「香港美酒佳餚巡禮」（Wine & Dine）。今年係Wine & Dine十周年，我哋希望可以進一步擴大場地規模，同時亦計劃引入更多不同類型的新元素，希望可以提升入場人士的品酒體驗。至於由11月開始嘅「香港郊野全接觸」，我哋就計劃介紹多條行山徑及單車旅遊路線，以及地質公園的特色景致，希望讓旅客感受香港大自然嘅一面。
除此之外，「一程多站」旅遊亦是近年主要推廣策略，我知道不少旅客都鍾意「一程多站」嘅旅遊模式，以香港為起始站之後轉往不同地方繼續旅遊。嚟緊下半年，港珠澳大橋以及高鐵香港段將會通車，加上郵輪旅遊嘅拓展，「一程多站」旅遊路線將更加豐富、更具特色，我哋計劃緊推出新特輯，同時亦會同業界合作，推廣全新「一程多站」旅遊體驗。
希望下半年可以繼續keep住旅客增長勢頭，我相信隨着高鐵、港珠澳大橋通車，以及大灣區區域旅遊的發展，將會為香港旅遊業帶來更多機遇。
(刊於頭條日報)