ENG

文創產業起飛了(林建岳) – 評論文章

環顧世界,創意、創新已經成為推動國家或者地區經濟嘅主要動力,文化創意產業更加成為近年全球的新興產業之一。

剛過去嘅周一,由香港文化產業聯合總會(文聯會)委託恒生管理學院做嘅「香港與大中華地區文化及創意產業發展白皮書」正式發佈。當日我哋仲舉辦研討會,邀請到四位專家擔任嘉賓講者,共同探討大中華地區嘅文化創意產業,包括來自日本的佐佐木雅幸教授、台灣的盛治仁博士、北京的熊澄宇教授,以及香港的陳達文博士。

今次研討會聚焦香港與大中華地區嘅文創產業發展,其實係想帶出一個「大中華文創經濟圈」嘅概念。兩岸四地同宗同源、語言文化相通,共同發展文創產業,可以實現優勢互補,形成區域經濟發展,共同把握大中華區文創產業蓬勃發展帶來嘅機遇。

近年內地文創產業高速發展,尤其是北京、上海、廣州、深圳等大城市發展更加是一日千里,發展出形形色色的文化產業園區。喺香港,特區政府已經將文創產業劃成十一個類別。過去幾年,本港文創產業平均增長比GDP升幅更為迅速。二○一四年,文創產業佔GDP約百分之五,為本地創造二十一萬個就業職位。

現在,香港有兩個新興產業,雖然冇乜人注意,但其實已經增長得非常好,一個係「創新及科技」,另一個就係「創意產業」,特別係當中嘅文化產業。

有啲朋友可能對文化產業嘅概念比較模糊,今次「白皮書」就係希望讓社會各界更多了解香港喺文化產業板塊上取得嘅成績。面對國家「一帶一路」戰略發展,香港如果能把握機遇,而政府喺政策同埋資源上有更多配合,本港文創產業將可以喺「21世紀海上絲路」文化貿易之中,擔當重要角色。我相信,乘着區域經濟契機,本地文創產業發展可望再創高峰。

(刊於 頭條日報)