香港美酒佳餚巡禮（Wine and Dine Festival）上周一連四日於中環海濱活動空間舉行，剛剛在周日落幕。雖然第三日受天雨影響，不過，今年入場人次仍比去年多，有超過十四萬五千人次入場，真係要衷心多謝旅客同本地市民嘅熱烈支持。
今年美酒佳餚巡禮真係愈夜愈精采。尤其係星期五晚，不少朋友喺傍晚收工後相約入場Happy Hour。嗰晚我由中環入口進場時，仲見到售票處出現即場購票人潮。至於場內亦人頭湧湧，有參展商同我講，今年人流暢旺，絕對有助帶動生意。
今年攤位數目增加兩成至超過四百一十個，其中有二百八十個攤位推介來自世界各地佳釀，另外一百三十個就出售特色美食。初步總結，場內反應不俗，今年新設嘅「香港吧」更大受市民及旅客歡迎，當中，以香港主題嘅雞尾酒大收旺場。除此之外，今年手工啤酒繼續encore，更有參展商引入十五款本地及外國手工啤，受到不少年輕朋友歡迎。有朋友同我講，喺活動攤位淺嚐品酒後，更轉場過咗去蘭桂坊繼續下場暢飲，相信亦帶動不少附近酒吧嘅生意。宏觀而言，我本人亦看好香港及內地餐酒市場，預期未來幾年，入口香港的餐酒總價值會繼續上升，而港人對餐酒嘅質素要求，亦愈來愈高。
往年都有進場嘅朋友同我講，其實品味館（tasting room）真係可以打造成為一間幾高格調嘅餐廳。所以今年，我哋都喺呢方面都多下功夫。Tasting room嘅帳篷專程由德國訂製，外觀相當特別，以玻璃結構組成，空間感十足。今年我哋仲加強咗空氣調節，令喺入面用餐嘅朋友更舒適。至於開幕禮當晚嘅嘉賓晚宴，我哋除咗請到多間米芝蓮星級食肆同本地得獎餐廳合作烹飪首本名菜外，仲搵埋「亞洲50最佳餐廳」榜首食肆曼谷Gaggan嘅印度籍主廚Chef Gaggan，主理其中一道叫「Charcoal」嘅招牌菜，令到賓客都有難忘嘅美食體驗。
當然，旅發局做各種各樣嘅工作，目標都係吸引多啲旅客，尤其係過夜旅客嚟到香港，令各行各業都做多啲生意。緊接着Wine and Dine Festival，旅發局嘅「香港郊野全接觸」活動就會喺聽日展開，重點推介香港優美嘅自然風光。之後兩個月，我哋仲會有新一輪「閃躍維港3D光雕匯演」、「繽紛冬日節」，同除夕倒數等活動，再加上一連串海外宣傳，希望可以吸引更多旅客來港，探索一下香港豐富多元嘅體驗，同感受一吓我哋獨特嘅地道文化。
(刊於 頭條日報)