一年一度嘅香港影視娛樂博覽(Entertainment Expo)今個星期一舉行，財政司司長、國家廣電總局副司長，仲有我哋香港影視娛樂大使Leon黎明同埋我一齊主禮啟動儀式。今年我哋嘅口號係「香港影視娛樂博覽，想你倒轉都背得返」。相信大家睇完由Leon演出嘅宣傳片，都會驚歎Leon竟然可以將博覽各項活動倒轉嚟背。事實上，今年博覽嘅節目真係較去年更多更精采，就算就咁背出嚟都唔容易。
今年繼續有香港國際影視展(FILMART)為博覽揭開序幕。今次FILMART吸引八百八十八間來自三十五個國家和地區嘅參展商參與，展出各式各樣嘅優秀作品。我哋亦舉行了14場主題研討會，很高興邀請到50多位國際知名嘅業內人士擔任演講嘉賓。近年電影同電視市場不斷轉變，創新科技廣泛應用，為咗滿足行業需求，我哋會積極拓展FILMART及各項活動，希望明年可以進一步擴大規模，將研討會升級為一個大型亞洲影視論壇。同一時間，星期一我哋寰亞電影亦喺博覽當中舉行「2019寰亞電影發佈會」，展示今年多部重量級電影製作，包括荷里活導演雷尼·哈林(Renny Harlin)執導嘅動作影片《沉默的證人》，奧斯卡導演瀧田洋二郎執導嘅《聞煙》，新晉導演黃慶勛執導、郭富城攜手楊千嬅主演嘅影片《麥路人》，麥曦茵執導、鄭秀文、賴雅妍、李曉峰領銜主演嘅治瘉系電影《花椒之味》，周顯揚與韓庚再度合作嘅影片《我們永不言棄》，葉念琛導演嘅電影《阿索的故事》等多部不同題材嘅年度大作。
講開又講，《沉默的證人》係今屆香港國際電影節嘅開幕電影，嚟緊下個月正式上映。我睇過試片，電影將法醫題材故事同港產警匪片元素巧妙結合，上演一場亡命激鬥，真係非常之緊張刺激，相信會帶畀觀眾一場視覺盛宴。
我哋希望可以培育更多優秀電影人才，尤其是年輕新血，創作更多優秀影視作品，推動我哋香港電影業再創高峰。
(刊於頭條日報)