ENG

影壇需新血 (林建岳) – 評論文章

「香港電影金像獎」創立於一九八一年,當時香港電影業發展蓬勃,金像獎成為香港影壇以至亞洲影壇的重要獎項,亦係華語電影的極高殊榮,成為不少演員、導演、編劇等幕前幕後創作人員嘅畢生追求。

第三十六屆金像獎頒獎典禮日前舉行,寰亞有份投資嘅《樹大招風》,奪得「最佳電影」、「最佳導演」、「最佳男主角」、「最佳編劇」以及「最佳剪接」共五個獎項。呢部電影係「新老合作」之作,即係由三位年輕新晉導演許學文、歐文傑、黃偉傑執導,兩位影壇前輩杜琪峯、游乃海監製,今次可以囊括多個獎項,真係非常難得。

今屆金像獎有五位新晉導演,憑藉三部作品入圍「最佳導演」,可以話係一個突破。除了《樹大招風》嘅三位導演之外,入圍嘅仲有另外兩位新晉導演黃進(《一念無明》)、曾國祥(《七月與安生》),年輕導演可以有此成績,絕對唔簡單。我接觸過不少年輕電影人,佢哋有自己嘅創意同想法,尋找更多發展機會,因此,投資電影時,培養年輕人才絕對會是其中一個考慮。

其實,金像獎由第二屆就開始設立「最佳新演員」獎、再於第21屆開始設立「新晉導演」獎,呢兩個獎項就係為咗培養更多出色嘅新晉演員及導演,鼓勵佢哋係電影路上繼續前行,不少早年曾經入圍的新晉演員和導演,如今早已成為資深電影人。

香港電影曾經蜚聲國際、享譽全球,有華人嘅地方就有港產電影。時至今日,電影業發展面對重重挑戰,合拍片逐漸成為香港電影發展嘅一條新路,電影行業要傳承同發展,就需要吸納更多年輕新血,只有努力創作更多影視作品,開拓更為廣闊的內地和海外市場,才能再創香港電影嘅高峰。

(刊於 頭條日報)