ENG

延續傳說 (林建岳) – 評論文章

一段香港愛情故事由二○○九年張志明(余文樂飾)同余春嬌(楊千嬅飾)喺後巷撻着一支煙開始,煙圈發展到馬桶內煙霧瀰漫的激情。到二○一二年,再由激情化為習慣,分隔異地,分分合合再度牽手,彷彿係這個狹小城市愛情故事的寫照。五年過後,兩人步向七年之癢。由彭浩翔執導,千嬅、樂仔領銜,原班人馬打造嘅《春嬌救志明》昨日正式上映,繼續延續呢段與香港人風雨同路的愛情故事。

由《志明與春嬌》、《春嬌與志明》,拍到第三集《春嬌救志明》,每一集,都有一些歌,會令你記得。延續首兩集翻唱經典K歌傳統,由甄妮《最後的玫瑰》,到上一集王馨平《別問我是誰》﹔今次《春嬌救志明》中,春嬌與Isabel(陳逸寧)同Brenda(林兆霞)合唱《傳說》,仲用「MKB48」作為組合名,經寰亞音樂正式推出。

一九八七年推出的《傳說》,係香港八十年代組合Radias嘅名曲,首歌融合中式樂器與當年流行的電子音樂,由林夕填詞。《傳說》的詞,不論文學底蘊與「入腦」程度總叫人難忘,歌詞內包含了經典戲寶《梁祝》、《紫釵記》、《帝女花》故事精髓,巧妙地將古今比對,反映現今愛情短暫。

另外,今次電影嘅同名主題曲《春嬌救志明》,係以台灣五月天十八年前出道專輯中一首台語歌《志明與春嬌》為原曲,由黃偉文重新填詞,五月天再度獻唱。其實,彭浩翔一直好鍾意五月天嘅呢首《志明與春嬌》,我知道,當初就係呢首歌帶畀佢創作靈感,今次可以一齊合作,可以話係十分難得。

春嬌與志明眨眼已踏入七年感情期限,今次喜怒離合的張力,一定令大家繼續高潮迭起。

(刊於 頭條日報)