平時如果喺公司食完晏，同事都會坐低吹吓水，奇怪呢幾日年輕同事食完飯就唔見咗影，原來走晒落街「捉小精靈」。
今個星期城中最hit嘅話題，一定係「Pokémon Go」。遊戲周一在港上架，短短幾個鐘已榮登下載App榜首，仲要畀佢喺fb瘋狂洗版：見到好多中環上班族，甚至身邊同事、朋友，都突然化身精靈訓練員，就連我呢個平時冇咩打機嘅人，都要體驗一下。
中環金鐘附近就有幾個Pokestop同訓練場，我見過好多人走在中環街頭，好留心望住手機熒幕，但從他們的神情同動作你一定知，佢係一名小精靈訓練員。佢哋個個猶如個game loading版面的一句警告﹕「stay aware of your surroundings」。
今次Pokémon Go風靡全球的其中關鍵就係活用創意，佢用嘅科技其實已經包含在一部普通的智能手機當中。技術層面上，是將擴增實境（Augmented Reality）加上GPS等技術與網絡遊戲結合。不過，有年輕人同我講，原來好多八、九十後細細個嗰時，都或多或少會幻想過自己係訓練員，同小精靈一齊歷險。因此，用呢set技術套上Pokémon呢個brand，讓player在現實世界「捉小精靈」，這個遊戲已經唔係停留喺「好唔好玩」呢個層次，而係recall「集體回憶」，令player覺得「玩game令我好開心」，呢條戲橋先係成個game的威力。當然，家都有唔少商場、餐廳甚至主題公園都開始同Pokémon Go傾吓有冇合作空間：仲有players的大數據，真係商機無限。
今次熱潮畀咗我哋一個啟示：創意唔一定要好複雜，好似AR技術其實已發展多年，但係如何將一件事re-package、mix-and-match、think out of the box，就係致勝關鍵、我們應該思考有時將手上資源重新package，都一樣可以有新意。譬如今年四月的「香港國際七人欖球賽電車酒吧」，其實電車同酒吧日日都見到，不過repackage成為「流動電車酒吧」，就帶畀旅客不一樣體驗。創意，唔只帶來商機，更重要可以為我們改進生活。創意解難，唔知可唔可以幫到我哋解開一啲社會上的結呢？
(刊於 頭條日報)