港產電影多年來風靡全球，近至東南亞、遠至美加，有華人嘅地方，就有香港電影。時代在變，電影產業也在變，近年香港電影在拍攝製作上不斷創新，加入更多新元素，包括電影題材、拍攝地點、演員製作人、以至合作方式等方面都有更多新嘅嘗試。
上星期日晚，寰亞集團喺北京舉行晚會，公佈新一年多個電影同劇集製作。電影方面，既有本土題材，亦有合拍片，包括《追捕》、《春嬌救志明》、《建軍大業》、《鮫珠傳》、《蕩寇風雲》、3D版《射鵰英雄傳》等。而喺電視劇方面，早前已經開播嘅網絡劇集《無間道》今年將會繼續推出第二季。除此之外，我哋仲會為贏得金馬獎雙影后殊榮嘅電影《七月與安生》拍攝電視劇版，以及由《衝上雲霄》原班人馬打造嘅航空題材電視劇。總之嚟緊一年絕對係好戲連連。
當中不得不提嘅係重頭戲《追捕》。相信不少朋友都記得由佐藤純彌執導、高倉健主演嘅《追捕》，電影於一九七六年上映，係文革後內地首批進口影片，當年曾風靡一時，觀影人次超過八億，係一代人嘅集體回憶。
今次我哋重拍《追捕》，邀請到執導過多部動作片嘅吳宇森擔任導演，演員包括張涵予、戚薇、吳飛霞，以及日本男星福山雅治、韓國女星河智苑等。呢齣戲籌備歷時十七個月，拍攝近半年，拍攝中動用二百把道具手槍、六千發子彈、二千件服裝，內地、香港、台灣、日本及韓國多達四千人參與製作，投資額高達四點七億，絕對稱得上係大製作。電影排期二○一八年大年初一（二月十六日）上映，我有睇過一啲片段，實在非常期待。
近年合拍片成為電影產業發展嘅一條新路，繼《建國大業》、《建黨偉業》之後，兩地再有歷史題材嘅合拍片《建軍大業》，今次更由本港導演劉偉強執導，將於今年八月上映。其實合拍片不但豐富了電影題材，為市民帶來更多優秀電影作品；更重要嘅係，拓寬了香港電影產業嘅發展空間，讓本地電影人才有更多發展機會，亦吸引不少年輕一代投身業界，壯大本港電影產業。
(刊於 頭條日報)